«Nurly jol» baǵdarlamasy sheńberinde kúrdeli jóndeýden ótken halyqaralyq kúre joldyń uzyndyǵy − 100 shaqyrym. Strategııalyq mańyzǵa ıe avtojoldyń el ekonomıkasyn jandandyrýǵa tıgizer paıdasy zor. Ásirese «Batys Eýropa – Batys Qytaı» halyqaralyq kólik dálizindegi tranzıttiń ósýine múmkindik beredi. 2018 jyldyń ózinde 1,2 mln tranzıttik kólik, 4 mln adam Oral qalasy arqyly ótken eken. Aldaǵy jyldary kólik tasqyny budan da kóbeıedi deıdi mamandar.
II tehnıkalyq sanat boıynsha jóndelgen kúre jol jobasynyń tapsyrys berýshisi «QazAvtoJol» UK» AQ bolsa, «Uniserv» JShS bul isti eki jyl ishinde atqaryp shyǵypty. Qurylysqa barlyǵy 1500 adam tartylǵan. Asfaltbetondy jol tabanynyń jalpaqtyǵy 9 metr, sapasy dóńgelek negizine túsken 13 tonna salmaqty kótere alady. Táýligine 4403 kólik ótkize alatyn kúre joldy el men eldi jalǵap, memleket ekonomıkasyna nár beretin kúretamyr dese bolǵandaı.
− Reseıge Aqtóbe arqyly, Oral arqyly shyǵatyn joldar jańaryp jatyr. Endi Reseı de óz tarapynan osy bastamany jalǵaıdy dep oılaımyz.
Sonda Eýropamen bizdiń qarym-qatynasymyz jaqyndaı túsedi. Tabysty bolyńdar! Quttyqtaımyn. Kiriseıik jumysqa! – dedi Elbasy jalpyhalyqtyq telekópir kezinde jańa joldaǵy qozǵalysty bastap berip.
– Elbasynyń «Nurly jol» baǵdarlamasy boıynsha óńirde jyl saıyn 500 shaqyrym jol jóndelip jatyr. Sonyń ishinde bıyl respýblıkalyq mańyzy bar 285 shaqyrym jol kúrdeli jóndeýden ótti. Jol salýǵa bólingen qarjy kólemi de 7-8 mlrd teńgege jetip, kóbeıýde. Mine, sonyń ıgiligin el kórip, «Oral – Tasqala – Ozınkı RF» joly paıdalanýǵa berildi, − deıdi oblys ákimi A.Kólginov.
О́ńirde Oral qalasy arqyly ótetin halyqaralyq jol túıinderi, ony ońtaılandyrý isi qarqyndy júrýde. Máselen, Atyraýdan keletin kúre joldy Oraldyń aınalma joly arqyly Saratov kúre jolyna qosatyn 32 shaqyrymdyq jol bóligi kelesi jyly iske qosylmaq. Onyń 20 shaqyrymy qazirdiń ózinde ázir. Budan bólek Saratov pen Samara qalalaryna shyǵatyn kúre joldar da Oral qalasynyń aınalma joly arqyly jalǵanady.
Qazbek QUTTYMURATULY,
«Egemen Qazaqstan»
Batys Qazaqstan oblysy
