Aýmaǵy atshaptyrym demalys ornyna qylqan japyraqty 100 túp aǵash jáne jergilikti klımatqa beıimdelgen 600 túp qara aǵash otyrǵyzylǵan. Jaıly oryndyqtar qoıylyp, kelýshilerdiń demalýyna jaǵdaı jasalǵan. Jaýyn men ystyq kúnnen qorǵan bolatyn zamanaýı bastyrmalar da saıabaqtyń ajaryn ashyp tur. Kóktem aılarynda saıabaq ishi kompozıtor ániniń notalary beınelene otyryp, gúldermen kómkerilmek. El ıgiligine berilgen saıabaq tórinde asa kórnekti sazger, memlekettik Ánuran mýzykasynyń avtory Shámshi Qaldaıaqovtyń eńseli eskertkishi de boı kóterdi. Saıabaqtyń ashylý saltanatynda aýdan ákimi Erlan Aıtahanov turǵyndardy Táýelsizdiktiń 27 jyldyq mereıli merekesimen quttyqtap, kompozıtor saıabaǵy men eskertkishiniń lentasyn qıdy. «Elbasynyń jýyrda jaryqqa shyqqan «Uly dalanyń jeti qyry» maqalasynyń «Uly dalanyń uly esimderi» bóliminde uly tulǵalar shoǵyryn keńinen nasıhattap, eskertkishter men tulǵalar galereıasyn jasaý syndy birqatar mańyzdy bastama kótergeni belgili. Bar qazaqty ásem ánimen áldılep, óner kókjıegin syrly ánderimen kómkergen sazger atyndaǵy saıabaq aýyl turǵyndary men onyń qonaqtary úshin tamasha demalys orny bolmaq. Elimizdiń eń basty baılyǵy, eń asyl qazynasy − halqy. Sol halyqtyń salamatty ári rýhanı kúsh-qýatqa baı bolyp ómir súrýi úshin osy sekildi saıabaqtar qyzmet ete beredi degen senimdemin», dedi Erlan Aıtahanov.
Saltanatty shara barysynda uly sazgerdiń balalyq shaǵynan kórinister qoıylyp, ánderi shyrqaldy.
Ǵalymjan ELShIBAI,
«Egemen Qazaqstan»
Túrkistan oblysy
