Qalıolla Samatuly – Sankt-Peterbýrg qalasynda ornalasqan I.E.Repın atyndaǵy Keskindeme, músin jáne arhıtektýra ınstıtýtynyń túlegi jáne qazaqtyń áskerı dástúrli qarý-jaraq tarıhyn zerttep júrgen bilikti maman. Atalmysh sala boıynsha avtor 100-den asa ǵylymı-tanymdyq maqala jáne úsh úlken monografııa jazǵan. Sýretshiniń kórkem týyndylary qazir Anglııa, AQSh, Shvesııa, Pákistan, Japonııa, Germanııa, Iran, Qytaı, Túrkııa jáne Reseı elderindegi jeke kolleksııalar qorynda saqtaýly tur.
Etnograf-sýretshiniń osy jolǵy kórmesine 120-dan astam týyndy kórermen nazaryna usynylǵan eken. Atap aıtqanda, «Qazaq halyq ertegisi» jáne «Syrttandar» mýltfılmine jasaǵan eskızderi, qazaq jaýyngeriniń HVIII ǵasyrdaǵy qorǵanys jaraqtary (dýlyǵa, kireýke, sharaına, jaýyngerlik jeńse, tizelik), sondaı-aq kóshpendilerdiń orta ǵasyrda qoldanǵan jaýyngerlik jádigerlerdiń arheologııalyq jáne ıkonografııalyq jańǵyrtpasy, Ǵun sarbazdarynyń kıimi men qarý-jaraǵynyń rekonstrýksııasy, arheologııalyq materıaldar boıynsha jasaǵan saq jaýyngeriniń kıimi men qarý-jaraq kesheni, sonymen qatar erkin taqyrypta folklorlyq obrazdar negizinde jazylǵan kórkem keskinder: «Baıshubar», «Taıbýryl», «Shalquıryq», taǵy basqa kartınalary bar. Bulardan basqa sheberdiń ǵylymı eńbekteri men avtorlyq qoljazbalary da kórme tórine ornalasypty.
Beken QAIRATULY,
«Egemen Qazaqstan»
