Kásipkerlik jáne týrızm basqarmasynyń basshysy Quralaı Jarova áleýmettik mańyzy bar azyq-túlik taýarlarynyń tutynýshylyq baǵalarynyń ındeksi 100,2 paıyzdy quraıtynyn jetkizdi. Kókónis ónimderine baǵany turaqtandyrý úshin qorǵa 500 tonna kartop, árqaısysy 100 tonnadan sábiz, oramjapyraq, pııaz satyp alynǵan. Qazir olar arzan baǵamen bosatylýda. Turaqtandyrý qoryndaǵy 25 myń lıtr ósimdik maıy naryqtyq baǵadan 25 paıyzǵa arzan saýdalanýda. Sol sııaqty qant, kúrish, qaraqumyq, jumyrtqa da arzan baǵamen saýda oryndaryna jetkizilýde. Qoljetimdi saýda núktelerin barlyq aýdan ortalyqtarynda ashý kózdelgen.
Q. Aqsaqalov aýdan ákimderine birqatar tapsyrmalar júktedi.
«Turaqtandyrý qoryndaǵy kúrishtiń bir kelisi 213 teńge turady. Kásipkerler oǵan 10 paıyz ǵana ústeme qosýyna bolady. Alaıda, júrgizilgen monıtorıngke qaraǵanda, kúrish Aqqaıyń aýdanynda 280 teńgeden saýdalanýda. Sol sııaqty Mamlıýt aýdanynda qant, Shal aqyn aýdanynda ósimdik maıy qymbattaǵan. Bul ákimdikter tarapynan baǵany yryqtandyrýǵa tıisti baqylaýdyń joqtyǵyn kórsetedi», deı kelip, Qumar Irgebaıuly ákimdiktiń apparatynyń basshysyna ár aýdan boıynsha azyq-túlik ónimderiniń baǵasyna monıtorıng júrgizýdi, kináli tulǵalarǵa jaza qoldanýdy mindettedi. Baǵany yryqtandyrý máselesine jurtshylyq ókilderin, depýtattardy, «Nur Otan» partııasynyń múshelerin tartý qajettigi atap kórsetildi.
Bıyl oblys ortalyǵynda zamanaýı qoıma kesheni paıdalanýǵa berildi. Buryn qoıma bolmaǵandyqtan, kókónis naýryzdan bastap qymbattaıtyn. Endi onyń qory shilde aıyna deıin jetedi.
О́mir ESQALI,
«Egemen Qazaqstan»
Soltústik Qazaqstan oblysy
