Djıý-djıtsý óneriniń kójaldary, elimizge eńbek sińirgen sport sheberleri Shyńǵys Qasymov pen Qanat Jaqypbaevtyń júldesi úshin ótken jarysta Qazaqstannyń birqatar aımaǵy jáne Qyrǵyzstan men О́zbekstannan kelgen 200-ge tarta balǵyn boksshylar baq synady. Sol týrnırdi tamashalaý úshin Almaty oblysy Dene shynyqtyrý jáne sport basqarmasynyń bastyǵy, grek-rım kúresinen Olımpııa oıyndarynyń kúmis júldegeri Nurbaqyt Teńizbaev, bokstan Olımpıadalyq daıarlaý ortalyǵynyń dırektory, Olımpıada chempıony Ermahan Ybyraıymov pen onyń jeke bapkeri Tursynǵalı Edilov, KSRO kýbogynyń ıegeri Bolat Saǵyndyqov, dzıýdodan álem chempıonaty men Azııa oıyndarynyń júldegeri, sambodan álem chempıony Azamat Muqanov, Qazaqstannyń stýdentter quramasynyń aǵa jattyqtyrýshysy Dastan Sádýaqasov jáne basqa da el sportynyń damýyna orasan zor úles qosyp júrgen azamattar Joldybaı Qaıypov atyndaǵy aýylǵa arnaıy at basyn burdy.
Jarystyń jabylý saltanatynda sóz sóılegen dańqy boksshymyz, Olımpııa oıyndarynyń jeńimpazy Ermahan Ybyraıymov: «Búgingi tańda el boksynyń qarqyndy damyp kele jatqanyn aýylda ótken osyndaı jarystardan-aq baıqaýǵa bolady. Men búgin birqatar qyzyqty jekpe-jekterdiń kýási boldym. Ár óńirden daryndy balalardyń kóptep shyǵyp jatqanyna qatty qýandym. Kelesi jyly osy jas erekshelikteri boıynsha el birinshiliginiń jalaýy jelbireıdi. Búgingi týrnırde top jarǵan boksshylar sol jarysta da ózderin jaqsy qyrynan kórsetedi dep oılaımyn. Eń bastysy, jas órender erinbeı eńbektenýi kerek. Jattyǵý zalynda aıanbaı ter tógip, jaýapty jarystarda baryn salsa, alynbaıtyn qamal joq. Men ózim de osyndaı týrnırlerge qatysa júrip ysyldym. Sol arqyly sheberligim shyndalyp, aqyry Olımpııa oıyndarynyń altyn tuǵyryna kóterildim. Eger boks ónerine adaldyq tanytatyn bolsańdar, sender de sondaı bıikke kóterilesińder», – dep jas órenderge óz aqyl-keńesin berdi.
Esterińizge sala keteıik, osy jarys ıeleri Shyńǵys Qasymov pen Qanat Jaqypbaevtyń ekeýiniń de sporttyq joly bokstan bastalǵan. Jasóspirimder men jastar býyny arasynda judyryqtasa júrip, olar sport sheberligine úmitker dárejesine deıin jetti. Keıinnen djıý-djıtsý ónerine myqtap den qoıyp, kóptegen dúbirli dodalarda jeńis tuǵyryna kóterildi. Tarqatyp aıtsaq, álem jáne Azııa chempıonattarynda úsh retten bas júldeni oljalaǵan Shyǵys Qasymov búgingi tańda jekpe-jektiń bul túrinen tórtkúl dúnıedegi eń myqty sportshylardyń sanatyna erkin qosylyp otyr. Sol sekildi Qanat Jaqypbaevtyń da bir basyna jeterlik ataq-dańqy bar. Ol álem jáne Azııa chempıony.
