30 jastaǵy Gollandııanyń sportshysy erejesiz jekpe-jek álemindegi eń boıshańdardyń biri. Onyń boıy – 212 santımetr, salmaǵy – 120 kılo. Sporttyń bul túrimen Stefan Strýve 14 jasynan beri aınalysýda. Tórtkúl dúnıeniń ár qıyrynda ótken jarystarda ózin jaqsy qyrynan kórsetken keıipkerimiz 2009 jyldyń aqpan aıynda UFC-de kúsh synasý qurmetine ıe boldy. Oǵan deıin ol 16 ret jeńiske jetip, tek eýi kezdesýde ǵana jeńilistiń kermek dámin tatqan bolatyn.
UFC-de kileń «sen tur, men ataıyndar» jınalǵany barshaǵa málim. Sol sebepti de aıtýly uıymda ózin moıyndatý oǵan ońaıǵa soqqan joq. Ol birde utsa, endi birde utylyp júrdi. Desek te óziniń eńbekqorlyǵy men tabandylyǵy, batyldyǵy men jankeshtiliginiń arqasynda qysqa ǵana ýaqyt aralyǵynda san mıllıon jankúıerdiń ystyq yqylasyna bólendi.
2012 jyldyń 29 qyrkúıeginde Anglııanyń Nottıngem qalasynda ótken jarysta UFC-diń jarqyn juldyzy, keıinnen osy uıymnyń teńdessizi atanǵan Stıv Mıochıchti ekinshi raýndta uryp jyqqany kópshiliktiń esinde qaldy. Odan bólek, Stefan Strýve ár jyldary Cheız Gormlı, Pol Bentello, Patrık Berrı, Antonıý Rodrıgý Nogeıra, Antonıý Sılva syndy juldyzdardy jeńdi. Roı Nelson, Alıstar Overım, Andreı Orlovskıı, Mark Hant, Aleksandr Volkov sekildi sańlaqtarǵa ese jiberdi.
Bul Qazaqstanǵa meniń alǵashqy ret kelýim. Alǵan áserim óte jaqsy. Halqy da qonaqjaı eken. Al, shyndyǵyn aıtsam, Almatyǵa taban tiregenimizge birneshe kún bolǵanymen, qalany áli durys aralaı alǵan joqpyn. О́ıtkeni, erteń ótetin jarysta meniń dosym Nıl Van Noord óner kórsetedi. Ol germanııalyq Aleksandr Poppekpen aıqasady. Sol kezdesýden keıin jaqsy kóńil-kúımen shyqsaq, Almatyny aralyp úlgeremiz. Sondaı-aq, Beıbit Nazarov pen Martın Braýn arasynda ótetin osy keshtiń basty jekpe-jegi de qyzyqty bolady degen oıdamyn, – deıdi Stefan Strýve.
Esterińizge sala keteıik, Gollandııa sportshysy erejesiz jekpe-jekten ótken saıystarda barlyǵy 39 kezdesý ótkizip, 28 márte jeńiske jetti. 25 básekeni ol merziminen buryn aıaqtady.
Ǵalym SÚLEIMEN,
«Egemen Qazaqstan»
ALMATY
