Atqarylǵan jumystarǵa tolyqqandy baǵa berildi, aldaǵy mindetter saralandy. Klýb músheleri tolǵaqty oılaryn ortaǵa saldy. «Qazaq PEN klýbynyń» tikeleı aralasýymen jáne qarjylyq kómek kórsetýiniń arqasynda shetelden jaryq kórgen qazaq qalamgerleriniń shyǵarmalary týraly pikirleri jınalǵandardyń kóńilderinen shyqty. Bul bastama aldaǵy ýaqytta da jalǵasyn tapsa degen nıetterin bildirdi. Endigi kezekte shet tiline aýdarylatyn týyndylar aldyn ala talqylaýdan ótkiziletin bolyp sheshildi.
Qoǵamdyq birlestik tóraǵasy B. Ǵabdýllın jyl ishinde atqarylǵan jumystarǵa esep berdi. Esep birlestik músheleri tarapynan qanaǵattanarlyq dep baǵalanyp, kópshilik daýyspen B. Ǵabdýllın tóraǵalyqqa qaıta saılandy.
Otyrystyń qyzyǵy Pen-klýbtyń dástúrli laýreattaryn anyqtaý edi. Alty-jeti qalamgerdiń shyǵarmashylyq áleýeti, shyǵarmalarynyń búgingi kún talaptaryna saı kelýi jáne oqyrmandardyń talǵam-tarazysynan ótýi degen sekildi krıterııler jan-jaqty saralandy. Qorytyndysynda jazýshy Qýanysh JIENBAI «M. Áýezov» atyndaǵy, orys tilinde jazatyn qalamger, aýdarmashy Aslan JAQSYLYQOV «M. Maqataev» atyndaǵy syılyqtyń laýreattary dep tanyldy. Áriptesterge shyǵarmashylyq tabystar tileımiz.
