Forýmǵa Parlament Májilisiniń depýtattary, memlekettik organdardyń basshylary, Qazaqstan Respýblıkasyndaǵy sheteldik dıplomatııalyq ókildikterdiń ókilderi, iskerlik-qaýymdastyq, jas startapshylar, etnomádenı birlestikterdiń jetekshileri men músheleri qatysty.
Is-shara Memleket basshysynyń kásipkerlikti damytý jónindegi tapsyrmalarynyń sheńberinde otandyq ónimderdi jáne qazaqstandyq kásipkerlerdiń ımport almastyrý boıynsha bastamalaryn nasıhattaýǵa baǵyttalǵan.
Jıyn uıymǵa múshe kásip ıeleriniń kórmesinen bastaldy. Keń dálizge qaz-qatar ornalastyrylǵan jergilikti ónim óndirýshilerdiń, qolónershilerdiń, jas startapshylardyń qoldarynan shyqqan dúnıeler men olar kórsetetin qyzmet túrleri san alýan.
Jalpy otyrysty QHA Tóraǵasynyń orynbasary – Hatshylyq meńgerýshisi Leonıd Prokopenko ashty. Onyń aıtýyna qaraǵanda, assosıasııa músheleri arasynda tereń áriptestik qarym-qatynas ornaǵan. Sondaı-aq qazirgi ýaqytta qaýymdastyq músheleri elimizge ınvestısııa tartýǵa baǵyttalǵan birqatar jobalardy qolǵa alǵan. Oǵan qosa, assosıasııa halyqaralyq kelisimder deńgeıine shyǵyp úlgergen. Bul jumystardyń barlyǵy Elbasy Joldaýynda kórsetilgen mindetterdi oryndaýǵa baǵyttalǵan. Sondyqtan atalǵan uıym kelesi jyly oryndalýy tıis bes mindetti belgilegen.
– Olar agroónerkásip kesheniniń áleýetin iske asyrý – ǵylymı agrarlyq-ınnovasııalyq ortalyq qurý, aýyl sharýashylyǵy salasyndaǵy bedeldi sheteldik jáne otandyq mamandardy tartý. Ekinshisi, jastar kásipkerligin damytý – jas, bastamashyl kásipkerlerdi qoldaý, aýyldyq jerlerde kásipkerlikti damytý, óńirlerde jastardy qoldaý ortalyǵyn qurý. Úshinshisi, ımportty almastyrý jáne kooperasııa ortalyǵyn damytý − halyq tutynatyn taýarlardy óndiretin kásiporyndardyń («qarapaıym zattardyń ekonomıkasy») yntymaqtastyǵyn damytý. Tórtinshisi, tehnologııa jáne quzyretterdi berý – zamanaýı tehnologııalardy tartý, kásipkerlerge jańa bıznes daǵdylaryn úıretý. Besinshisi, «jasyl» ekonomıka – tabıǵı resýrstardy utymdy paıdalanýǵa baǵyttalǵan jobalardy qoldaý jáne ilgeriletý, tabıǵat paıdalanýshylarynyń odaǵyn, kógaldandyrýshylar konsorsıýmyn qurý, – dedi L.Prokopenko.
Jalpy, Qazaqstan halqy Assambleıasy Kásipkerler assosıasııasy qoǵamda birlik pen kelisimdi naqty isterdiń aınalasynda shoǵyrlandyratyny buqaraǵa málim. Olardyń qataryndaǵy qalyptasqan, tolysqan, jetilgen kásipkerler ár kezde áleýmettik jaýapkershilikterin esten shyǵarǵan joq. Sonymen qatar jastardy kásipke baýlýdy mindetine alyp, qanattandyrýdy maqsat tutqan.
Jıyn barysynda Májilis Tóraǵasynyń orynbasary Vladımır Bojko, Májilis depýtaty, Qazaqstan halqy Assambleıasy Kásipkerler assosıasııasynyń qurmetti tóraǵasy Iýrıı Tımoshenko, Májilis depýtaty Albert Raý, «Ulttyq agrarlyq ǵylymı-bilim berý ortalyǵy» KEAQ basqarma tóraǵasy Ulan Tájibaev sóz sóıledi. Olar negizinen kásipkerlikti damytýdaǵy memlekettik qoldaý, kásiptiń jańa qyrlary men halyqaralyq baılanystar jóninde oı órbitti.
Jalpy otyrystyń sońynda Qazaqstan halqy Assambleıasy Kásipkerler assosıasııasy fılıaly dırektorlaryna kýálikter tapsyrylyp, birqatar memorandýmdarǵa qol qoıyldy.
Serik ÁBDIBEK,
«Egemen Qazaqstan»
