Mamandardyń boljamy boıynsha, qundy jádigerler HIII ǵasyrda saltanat qurǵan Altyn Orda dáýirine tıesili bolýy múmkin. Dese de, munyń anyq-qanyǵyn bilý maqsatynda artefakt materıaldar AQSh jáne Japonııanyń ǵylymı ortalyqtaryna zerthanalyq saraptamadan ótkizilýge jiberilgen. Onyń qorytyndysy jyldyń sońyna taman belgili bolady.
– Qazan aıynda júrgizilgen qazba jumystary kezinde 2 metr 35 santımetr tereńdikten áıel adamnyń súıekteri shyqty. О́kinishke qaraı, tas tabyt ýaqyt óte kele qırap qalǵan. Qabir ishinen altynǵa uqsas sary metaldan jasalǵan tostaǵan, syrǵa men shashqa arnalǵan túıreýish sııaqty áshekeı buıymdary, sondaı-aq, tozǵan matanyń qaldyqtary – altyn jipteri bar jibek jáne bylǵary etik tabyldy, – dedi arheolog, «Halyk kazynasy» ǵylymı-zertteý ınstıtýtynyń qyzmetkeri Aıbar Qasenalın.
Altynnan jasalǵan dep topshylanǵan tostaǵannyń túbinde qyzǵaldaq pishininde bederlengen órnek bar. Mamandardyń boljaýynsha, qabirde asyl tuqymdy áýletten shyqqan áıel jerlengen, al tabylǵan jádigerler men buıymdardyń túrleri ıslamǵa deıingi kezeńge jatýy ábden múmkin.
– Joba maqsaty – ortaǵasyrlyq mazardy antropologııalyq turǵydan zerttep, jerleýdiń qaı kezeńde iske asyrylǵanyn jáne jerlengen áıeldiń dárejesi qandaı ekenin anyqtaý. Biz tabylǵan bas súıek boıynsha bettiń pishinin qalypqa keltirýdi josparlap otyrmyz, – dep málimdedi tarıhı-mádenı murany saqtaý jónindegi ortalyqtyń dırektory Túlkibaı Tóleýov.
Ortaǵasyrlyq sáýlet óneriniń eskertkishi sanalatyn «Bolǵan Ana» kesenesi Ulytaýdan ońtústik-shyǵysqa qaraı 60 shaqyrym jerde, Sarysý men Qarakeńgir ózenderiniń quıylysynda ornalasqan.
Qaırat ÁBILDA,
«Egemen Qazaqstan»
Qaraǵandy
