«Halyq qaýipsizdigin qamtamasyz etý» jobasynyń aldyna qoıǵan maqsaty san alýan. Bul – máni de, maǵynasy da óte keń uǵym. Bir sózben aıtqanda, ony búgingi zaman talaptaryna saı halyqpen tyǵyz qarym-qatynas jasaýdyń jańasha bir tetigi, ońtaıly ádisi deýge bolady», dedi Aqtóbe oblysynyń ákimi Berdibek Saparbaev jobanyń keıingi kezeńiniń qorytyndysyna baılanysty ótkizilgen komıssııa otyrysynda.
О́ńir basshysynyń oı-pikirin sál tereńdete túser bolsaq, atalǵan joba aıasynda qaıyrymdylyq qaǵıdattary qanat qaǵyp, jetimderdi jebep, súringendi demeý jóninde biraz istiń basy qaıyryldy. Onyń basty bóligin qaıyrymdylyq kómekter quraıdy. Sondaı-aq kásipkerlikti damytý men júrgizý boıynsha semınarlar, trenıngter men sheberlik sabaqtary ótkizildi. Joba – shaǵyn jáne orta bıznesti damtyýǵa qatysty qabyldanǵan memlekettik baǵdarlamalardy el-jurttyń arasynda keńinen túsindirýge basymdyq beredi.
Búgingi kezde elimizdiń qaı óńirinde bolsyn, teris dinı aǵymdardyń jeteginde júrgender kezdespeı qalmaıdy. «Adasqannyń aıyby joq, qaıtyp úıirin tapqan soń» demeı me dana halqymyz. Osy oraıda teologter men dinı aǵartýshylyq baǵytta qyzmet jasaıtyn sarapshylar tobynyń qyzmeti de tıisti nátıjesin berip júr.
Destrýktıvti dinı aǵym ókilderimen jekelegen jáne toptyq kezdesýler ótkizý úrdisi de engizildi. Qandaı teris qubylys bolsyn, onyń aldyn ala bilgen jaǵdaıda zalal keltire qoımasa kerek. Bul rette kóńilge qonymdy, mazmunǵa baı, profılaktıkalyq is-sharalar jobanyń nátıjeli bolýyna yqpalyn tıgizýde. Qazirgi kezde joba sheńberinde júrgiziletin jumystardyń tıimdiligin odan ári kóterý joldary qarastyrylýda.
Respýblıka óńirleri arasynda halyqpen qoıan-qoltyq jumys júrgizýdiń balamasy joq joldary belgilengen ýaqyttan beri oblysta júıeli sharalar atqaryldy. Sonyń nátıjesinde maqsattyq kórsetkishterge qol jetkizildi. Muny eshkim joqqa shyǵara almaıdy. Búgingi basty mindet osymen shektelip qalmaı, halyqqa qajetti alǵysharttardy odan ári shırata túsý bolmaq.
Aıtalyq jobanyń jetinshi kezeńinde 126 is-shara ótkizilip, oǵan 14 myń adam qamtylypty. Árıne basty gáp sanda emes, sapalyq kórsetkishte, júrgizilgen jumystardyń turǵyndarǵa tıgizetin paıdasynda, kezdesý kezinde aıtylǵan áńgimelerdiń júrekterge jetýinde. Bul turǵydan da «Halyq qaýipsizdigin qamtamasyz etý» jobasynyń bási bıik tur.
Temir QUSAIYN,
«Egemen Qazaqstan»
AQTО́BE
