Zııaly qaýym ókilderi Prezıdenttiń «Uly dalanyń jeti qyry» maqalasyn talqylap, ádebı qaýymnyń aldynda turǵan keleli máselelerdi ortaǵa saldy. Plenýmda baıandama jasaǵan Qazaqstan Jazýshylar odaǵynyń Basqarma tóraǵasy Ulyqbek Esdáýlet Prezıdent maqalasynyń mán-mańyzyna, qundylyǵyna toqtaldy. «Biz otarshyldyqtyń qıyn-qystaýynan ótkennen keıin, ózimizdiń tarıhymyzǵa ózimiz qolymyz jetpeı zárý bolyp kelgen elmiz. Qadyr Myrzalıev aǵamyzdyń: «Bizdiń tarıh bul-daǵy qalyń tarıh, oqýlyǵy jup-juqa biraq-taǵy» deıtin sózinde úlken shyndyq baryn qaıtalap aıtýdan jalyqpaımyz. Sebebi, bizge óz tarıhymyzdy oqytpaı, ózimizden jasyryp, birneshe urpaqtyń basqa ulttardyń, ózge memleketterdiń tarıhyn óz tarıhymyzdan góri jetik bilip kelgenimiz jasyryn emes.
Biz 16 ǵasyrdan 19 ǵasyrǵa deıin jer betinen Uly dalany qorǵaý kezeńinde, ult retinde joıylyp ketpes úshin jan-jaqtan antalaǵan jaýlarmen qandy soǵys júrgize júrip, kóp qalalarymyzdan, mádenı muralarymyzdan, ejelgi kóne jetistikterimizden aıyryldyq, odan bergi ýaqytta bostandyǵymyz shektelip, tarıhı-órkenıet jolyndaǵy damýymyzdy toqtatyp aldyq... Aınalyp kelgende, moıyndalmaı kelgen dúnıelerdi osy maqala ıgerýge, menshiktenýge, úırenýge, keleshek urpaqqa ózimizdiń tarıhy qanshalyqty tereń ult ekenimizdi tanytyp, ózge elderge dáleldep, negizdep berýge jol ashyp otyr» dep atap ótti Ulyqbek Orazbaıuly.
Bıylǵy jyldyń 9 aıynda atqarylǵan istermen kópshilikti tanystyrýmen baıandamasyn jalǵastyrǵan Odaq basshysy osy merzim ishinde qazaq jazýshylarynyń eńbekterin nasıhattap, rýhanı, mádenı, áleýmettik turǵyda atqarylǵan sharalardy tizip ótti. Endigi kezekte Jazýshylar odaǵy zamanaýı kezeńniń jańashyl talaptaryn ıgerip, qazaq ádebıetin álemdik deńgeıde nasıhattap, jas qalamgerlerdi qoldaý baǵytynda tyń bastamalardy qolǵa alatyn bolady.
Osy Pleným aıasynda tóraǵanyń birinshi orynbasary Aqberen Elgezek qalamgerler qaýymyn Odaq Jarǵysynyń jobasymen tanystyryp, aldaǵy jumys tártibiniń raıynan habardar etti.
Pleným jumysy ary qaraı ádebıet ókilderiniń Prezıdent maqalasyna oraı aıtylǵan pikirleri men odaq jumysynyń mańyzdylyǵy turǵysyndaǵy erkin oılarmen jalǵasyn tapty.
Elvıra SERIKQYZY,
«Egemen Qazaqstan»
ALMATY
