Bıyl qarasha aıynda Balýan Sholaq atyndaǵy Sport saraıynda ashylǵan Visit Almaty týrıstik habyn aralý kezinde Premer-Mınıstrge konsýltasııa ortalyǵynda ár týrıstiń barlyq qajetti aqparatty: kartalardy, jolnusqaýlardy, taý baǵdarlarynyń atlastaryn, týroperatorlardyń broshıýralaryn, mádenı-buqaralyq sharalardyń ańdatpalaryn t.b. ala alatyny týraly baıandaldy. Budan basqa, konsýltanttar túrli máselelerdi — zańmen jáne densaýlyqpen baılanysty shuǵyl máselelerden bastap, logıstıkalyq, mysaly, «qaı jerde tamaq iship, Kóktóbege qalaı jetýge bolady» degen tárizdi máselelerdi sheshýge deıin kómek kórsete alady. 11 aıda ortalyqtan 25,2 myńnan astam týrıst keńes alǵan.
B. Saǵyntaev týrısterdiń aqparattyq ortalyǵyn aralap kórdi. Qazaq Oner qolóner ortalyǵynyń dırektory A. Janserikova fotoǵa túsýge bolatyn kıiz úı mańynda kıiz úımen tanystyryp, habtyń tıimdi ornalasýyn atap ótti. Munda týrıstik áleýetti ilgerletý boıynsha jobalar iske asyrylyp, óńirdiń básekege qabilettiliginiń jáne týrızmdi damytý múmkindikteriniń taldaýy jasalady. Ortalyq aýmaǵynda ulttyq stılde naqyshtalǵan jeti tanym aımaǵy ashyldy, týrısterge arnalǵan kovorkıng-alań bar.
Qala ákiminiń orynbasary E. Áýkenov óz kezeginde, júrgizilip jatqan jumystardyń arqasynda qaladaǵy týrıster sany bıyl ótken jylmen salystyrǵanda 11%-ǵa artqanyn baıandady. Almatyǵa 43,6% týrıst kelgen, bul Qazaqstanǵa keletin sheteldik týrısterdiń jartysyna jýyǵy. 2018 jyldyń II toqsanynda Almatyǵa kelgen týrısterdiń sany 503 myń adamdy qurady.
Týrıstik tartymdylyqty arttyrýǵa múmkindik beretin jobalardyń biri 2019–2020 jyldarǵa josparlanǵan, «Almaty-2» temrjol vokzalynyń rekonstrýksııasy bolady. Nysandy aralaý kezinde B. Saǵyntaevqa jobanyń «Almaty-2» jáne «Almaty-1» arasynda ekinshi joldy, qosymsha termınaldy, jerasty ótkelderi men qala mańy baǵyttary úshin jańa jolaýshylar platformalaryn salýdy qarastyratyny baıandaldy. Jalpy, vokzaldy jańǵyrtý nysannyń paıdaly aýmaǵyn eki esege arttyrýǵa múmkindik beredi.
Munda Premer-Mınıstrge ońtústik astananyń kólik ınfraqurylymyn damytý týraly baıandalyp, «Karsherıng» jańa servıs júıesi tanystyryldy. Bul júıe mobıldi qosymsha arqyly avtomobıldi mınýtpen jalǵa alýdy rásimdeýge múmkindik beredi. Bul qyzmet júrgizýshi kýáligi bar kez kelgen adam úshin qoljetimdi. Almatyda servıs osy jyldyń qazan aıynda iske qosyldy, ótken ýaqyt ishinde servıske tirkelgen paıdalanýshylar sany 10 myń adamnan asady. B. Saǵyntaev servıs paıdalanýshylary úshin qoljetimdi bolatyn jańa jeńil kólikter qataryn kórdi. Barlyǵy júzden astam avtomobıl qoıylǵan, 2019 jyly olardyń sany 500-ge jetedi, al 2021 jyly elimizde 1,5 myń avtomobılden turatyn park bolady. Anytime kompanııasynyń aqparatyna sáıkes, 2019 j. naýryzda servısti Astanada, al 2019 jyldyń sońynda Shymkentte iske qosý kózdelip otyr.
Almaty ákimdiginiń aqparaty boıynsha, bıyl qalalyq avtobýs parkin jańartý kórsetkishi 80%-ǵa jetedi. Jeke ınvestısııalar esebinen avtopark pen úshinshi býynnyń elektrlik avtobýstaryn shyǵaratyn zaýyt salyndy. Olardy ári qaraı qala marshrýtyna qosqannan keıin Almaty qalasynyń ekologııalyq ahýalyna oń áser eteri sózsiz. Sondaı-aq, Almatyda Qazaqstanda alǵashqy BRT (jyldamdyǵy joǵary qoǵamdyq kólik) jelisi uıymdastyryldy. Qoǵamdyq kólik úshin 110 shaqyrymdyq jol men 10 ortalyq kóshelerde bir jaqty qozǵalys engizildi, al Orbıtadan Jasyl bazarǵa deıin velodáliz jasaldy. Qalanyń ortalyǵyn shetki bólikterimen, qalaǵa qosylǵan aýdandarmen baılanystyratyn eki metro stansııasy salynyp jatyr.
Búginde Almatyda qoǵamdyq kóliktegi barlyq tranzaksııalardyń 97%-y qolma-qol aqshasyz júzege asyrylady. GPS júıesimen jáne avtobýstardaǵy beınekameralarmen avtomattandyrylǵan dıspetcherlik basqarý júıesi engizildi, sondaı-aq tasymaldaýshylardy sýbsıdııalaý kezinde jolaýshylardyń shaǵymdary túsetin aıyppuldar júıesi engizildi. Qalada jol qozǵalysy erejelerin buzýdyń foto-beınetúsirilim júıesi bar, 709 jolaq baqylanady, kelesi jyldan bastap posttar eki esege artpaq.
Esterińizge sala keteıik, Memleket basshysy týrızmdi damytýǵa erekshe kóńil bóledi. «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda kez-kelgen óńir úshin bolashaǵy jarqyn salanyń biri búginde álemdegi árbir onynshy jumys ornyn quryp otyrǵan ishki jáne kirmelik týrızmdi damytý ekendigi aıtyldy. Osyǵan baılanysty Úkimet ınfraqurylymdy damytý jáne týrızm ındýstrııasyndaǵy kedergilerdi joıý boıynsha keshendi jumys júrgizip keledi. 2019 jyly týrızmdi 2023 jylǵa deıin damytýdyń memlekettik baǵdarlamasy alǵash ret ázirlenedi. Baǵdarlamanyń negizgi kórsetkishi týrızmniń JIО́-ge qatysty úlesiniń 8%-ǵa deıin ulǵaıýy bolmaq.
