Saltanatty sharaǵa QR Bilim jáne ǵylym mınıstri Erlan Saǵadıev, QR Bilim jáne ǵylym vıse-mınıstri E.A.Sýhanberdıeva, QR Parlamenti Májilisiniń depýtattary, «О́rleý» BAUO» AQ Basqarma Tóraǵasy Gúlnas Ahmetova, bilim jáne ǵylym salasynyń kórnekti qaıratkerleri, bilim berýdi basqarý organdarynyń, oqý oryndarynyń, «О́rleý» BAUO» AQ fılıaldarynyń basshylary men qyzmetkerleri, sondaı-aq konkýrsqa qatysqan barlyq oblystar, Astana, Almaty qalalary jeńimpazdary men júldegerleri qatysty.
Mınıstr bul konkýrstyń bilim berý salasy úshin jáne pedagogtardyń biliktiligin arttyrýdaǵy joǵary mańyzdylyǵyna toqtaldy. Qatysýshylar men jeńimpazdarǵa alǵysyn bildirip, birinshi oryn ıegerlerin marapattasa, ekinshi oryn ıegerlerin Qazaqstannyń eńbek Eri Aıagúl Mırazova marapattady. Úshinshi júldeli oryn ıegerlerin «О́rleý» BAUO» AQ Basqarma tóraıymy Gúlnas Ahmetova quttyqtap, úlken jeńister bıigine jetińizder degen tilegin bildirdi.
Qazaqstannyń bilim berý júıesinde osyndaı aýqymdy konkýrstyq joba tuńǵysh ret ótip otyr. Konkýrs óńirlik jáne respýblıkalyq eki kezeń boıynsha ótti. Konkýrstyń óńirlik kezeńine 2750 pedagog qatyssa, ekinshi respýblıkalyq kezeńine 22 atalym boıynsha usynylǵan 940 beıne-sabaqtar men beıne-dáristerdiń 66-sy júldeli oryndy ıelendi.
«Pedagogıkalyq ıdeıalar panoramasy» respýblıkalyq konkýrsy aıasynda elimizdiń úzdik muǵalimderiniń ozyq tájirıbeleri taratyldy. Konkýrstyń barlyq beıne-sabaqtary men bene-dáristeri «О́rleý» BAUO» AQ YouTube-tegi Bilim kanalynda (https://www.youtube.com/channel/UCXC-idU18buI-_kCBLU16-g) jarııalandy. Búgingi kúnniń ózinde tirkelýshiler sany 32 myńnan asatyn «О́rleýdiń» Bilim kanalynda 1500-den astam beıne-sabaqtar, beıne-dárister bar jáne de ár kún saıyn jazylýshylar sany artyp keledi.
Elvıra Serikqyzy,
«Egemen Qazaqstan»
ALMATY
