Aýrýhana qyzmetkerleri «Dáriger naýqasty tek dárimen emdemeı, qaıyrymdylyq isimen de úlgi-ónege kórsete júrip, kómektesýi kerek» degen qaǵıdany berik ustanady. «Buryn biz donor kúnin jarııalap, turǵyndardy, mekeme ujymdaryn qan tapsyrýǵa shaqyryp keltire almaıtynbyz. Munyń oń sheshimi – ózgelerge ónege kórsetý, dep sheshtik. Osy ıgi isti qolǵa alǵaly beri áreketimizdi quptap, aýdandyq polısııa qyzmetkerleri biz sııaqty ujym bolyp kelip qan tapsyrýdy daǵdyǵa aınaldyrdy. Basqa mekemeler men aýyl turǵyndary da suranyp júr. Jańa jyl merekesinen keıin taǵy da uıymdastyrýdy josparlap otyrmyz», – deıdi bas dáriger.
Eń aldymen medısına mamandary buljymas talap boıynsha qan tapsyrýdy nıet etken adamnan synama alady. Gúldarııa Ádildabekqyzynyń aıtýynsha, bul donordyń densaýlyǵyn teksertýine tıimdi tásil. Bes birdeı qan taldaýyn tegin alady. Aǵzadaǵy qanttyń normasy, holesterınniń deńgeıi, taǵy basqa derekter sol mezette anyqtalady. Ekinshiden, qan bergen azamattyń aǵzasy jasaryp, densaýlyǵy jaqsarady. Úshinshiden, bul qan qajet bolǵan pasıentterge jasalǵan azamattyq úlken kómek, saýapty is. Medısına qyzmetkerleriniń úlgisi oń áser etip, búginde qaıyrymdylyqqa jaqyn báıdibektikter qan tapsyrý úshin ambýlatorııalardyń dárigerlerin jıi mazalaıtyn bolǵan.
Ǵalymjan ELShIBAI,
«Egemen Qazaqstan»
Túrkistan oblysy
