Qazaqstannyń ınternasıonalıst-jaýyngerleri ardagerlik uıymdarynyń otyrysy ótti

Otyrysta Aýǵan soǵysy ardagerlerine jáne ardagerlik uıymdarǵa qatysty birqatar ózekti ári mańyzdy máseleler talqylandy. Jıyn saltanatty marapattaý rási­mimen bastaldy. Qazaqstan Respýblıkasy Prezıdentiniń Jarlyǵyna sáıkes jáne Elbasy atynan Májilis depýtaty, «Nur Otan» fraksııasynyń múshesi, QAZAQSTAN ARDAGERLERI qaýymdas­tyǵynyń tóraǵasy Baqytbek Smaǵul Aýǵan soǵysynyń úsh ardagerine «Qurmet» ordenin tabystady.

Olar «Aýǵanstan arda­gerleri keńesi» tóraǵasynyń orynbasary Beısenǵalı Arystambekov (Almaty oblysy Qarasaı aýdany), «Boevoe bratstvo» fılıalynyń tóraǵasy Baýyrjan Muhamedıev (Qaraǵandy oblysy Balqash qalasy) jáne «Aýǵanstan jáne jergilikti soǵystar ardagerleriniń odaǵy» tóraǵasynyń birinshi orynbasary Serik Ospanov (Astana qalasy).

Basqosýda QAZAQSTAN ARDAGERLERI qaýymdastyǵynyń tóraǵasy Aýǵan soǵysynyń ardagerleri Elbasy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapa­syn arttyrý» atty Qazaqstan halqyna Joldaýynda alǵa qoıǵan «Mektepterde áskerı-patrıottyq tárbıeniń rólin kúsheıtý» mindetin júzege asyrýǵa atsa­lysyp, jas urpaq boıynda týǵan jerge degen mahabbat pen babadan qalǵan ba­tyrlyq qasıetin darytýǵa úles qosatynyn aıtty. Ol sonymen qatar «Aýǵanstannan keńes áskerleriniń Shekteýli kon­tıngentiniń shyǵarylýynyń 30 jyl­dyǵyna» oraı arnaıy medal shyǵarý týraly sheshim qabyldanǵanyn da tilge tıek etti. Mereıtoıǵa arnalǵan medalmen qatary 18 myńnan asatyn barlyq Aýǵan soǵysynyń ardagerleri marapattalmaq.

– Búginde Aýǵan soǵysynyń arda­gerleri Elbasynyń bıylǵy 5 qazandaǵy Joldaýynda aıtylǵan «Sarbaz» balalar-jasóspirimder birlestigin quryp, mek­tepterde áskerı-patrıottyq tárbıeniń rólin kúsheıtý mindetin oryndaýǵa belsendi qatysýda. Áskerı-patrıottyq tárbıe berý isinde osy jyldar ishinde árqaısymyz óz salamyzda, óz óńirimizde biraz naqty is tyndyrdyq, mol tájirıbe qordaladyq. Biz atqaratyn jumys áli kóp. Endi bul jumysty birlese ári úılesimdi negizde júrgizýge tıispiz, – deıdi Baqytbek Smaǵululy.

QAZAQSTAN ARDAGERLERI qaýymdastyǵy ótkizgen elimizdegi Aýǵan soǵysy arda­gerleri uıymdarynyń kezekten tys kon­ferensııasynda barlyq uıym bas­shylary «Qazaqstannyń ınterna­sıonalıst-jaýyn­gerleriniń ardagerlik uıymdarynyń Ortalyq Keńesin qurý» týraly sheshim qabyldady.

Atalǵan keńes óskeleń urpaqty áskerı-patrıottyq rýhqa tárbıeleý, Aýǵan soǵysy ardagerlerin áleýmettik qoldaý, sondaı-aq Qorǵanys mınıstrligi usynǵan, múddeli memlekettik organ­dardyń birlesken buıryǵymen bekitilgen «Aýǵanstannan keńes áskerleriniń Shekteýli kontıngentiniń shyǵarylýynyń 30 jyldyǵyna arnalǵan is-sharalardy ótkizý jónindegi negizgi jospar» boıynsha ary qaraıǵy jumystar men is-qımyldardy úılestiretin bolady. Bul jumysqa basshylyq etý QAZAQSTAN ARDAGER­LERI qaýymdastyǵyna júkteldi.