«On tórt jasymda qolyma dombyra alyp, sahnaǵa shyqqan edim, qazaqtyń jyr-termelerin aıttym. Mine, 80 jyldan beri qazaqtyń ónerin, jyryn janyma serik ettim, nasıhattaýmen kelemin. Ádette, memlekettik osyndaı marapatqa ıe bolǵandar: «mundaı marapatty ózime qaryzǵa alyp jatqandaı sezinemin, aldaǵy ýaqytta budan da jaqsy jumys isteıtin bolamyn» degen sııaqty lebizin aıtyp jatady. Men ne derimdi bilmeı otyrmyn» dep, ázildi jany súıetin Qasymhan aǵa jýrnalısterdi bir kúldirip aldy.
Ol tilimiz ben dinimiz esikten qarap qalǵan ýaqytta da halqymyzdyń aýyz ádebıetin, jyryn, aıtys ónerin nasıhattady. О́zi talaı aıtystarǵa qatysty. 1961 jyly Qazaqstannyń 40 jyldyǵyna oraı ótken aımaqtyq aıtysta bas júldeni jeńip aldy. Sol aıtys týraly «Sosıalıstik Qazaqstan» («Egemen Qazaqstan»), tipti «Pravda» gazeti jazǵan eken. Qasymhan aǵa Uly Otan soǵysynan Jeńispen oralǵan soń, biraz jyl muǵalim boldy, aldynan talaı shákirt bilim aldy. Onan keıingi jyldary jýrnalıstik qyzmette aýysyp, óńirdiń ózekti máselelerin eldiń, bıliktiń nazaryna alyp shyqty. Qasymhan aǵaıdyń óleńderi men pýblısıstıkalyq shyǵarmalary eki tom bolyp jaryq kórdi.
«Qostanaı sekildi tilimiz kóp zardap shekken óńirde halqymyzdyń tól ónerin ómir boıy nasıhattaý degen Qasymhan aǵanyń erlik isi deýge bolady. Ol kisiniń qarapaıymdylyǵy, kisiligi bir tóbe» dedi Qasymhan aǵanyń áriptes inisi, qazaq telejýrnalıstıkasynyń ardageri Qajy Qorǵan.
Názıra Járimbet,
«Egemen Qazaqstan»
Qostanaı
