Shyǵarmashylyq kórmeni ótkizýdegi basty maqsat – ulttyq qundylyqtarymyzdyń biri qysh ónerin qaıta jandandyrý. Sapasy óte berik keletin qysh buıymdardy óndirýdiń tarıhy áride jatyr. Áýelde sharýashylyq, turmystyq maqsatta keń qoldanysqa ıe bolǵan qysh óndirisiniń tehnologııalyq tásilderi búginde áldeqaıda jetile túsken. Máselen, osy kórmege qoıylǵan túrli kádesyılar, gúlge arnalǵan ádemi qumyralar, qyshtan jasalǵan kartınalar men fotosýretke arnalǵan ramkalar kóptiń qyzyǵýshylyǵyn oıatyp, ózindik daralyǵymen úlken suranysqa ıe ekenin ańǵartty. Sándik qoldanbaly óner kafedrasynyń stýdentteri men akademııalyq utqyrlyq boıynsha fakýltette oqyp jatqan reseılik stýdentter Aleksandra Shýplıakova jáne Tatıana Teterına sheberlik dáristerin kórsetti.
– Ər halyqtyń tarıhy qasıetti qundylyqtarymen qymbat ekenin Memleket basshysy «Uly dalanyń jeti qyry» maqalasynda aıryqsha atady. Stýdentterdiń oqý jáne shyǵarmashylyq jumystary aıasynda kópshilikke ulttyq dástúrimizde erekshe tarıhı mánge ıe ultymyzdyń qolóner buıymdaryn keńinen nasıhattaý basty maqsatymyz, – deıdi keskindeme, músin jáne dızaın fakýltetiniń dekany Baýyrjan Baıdilda.
Kórme barysynda akademııanyń stýdentteri ulttyq kúıimiz ben jyrymyzdy áýeletip, kópshilikti tánti etti. Kórmege jıylǵan qaýym qazaqtyń qasıetti qolóner buıymdaryn asqan sheberlikpen jasap júrgen on saýsaǵynan óner tamǵan jastarǵa úlken rızashylyǵyn bildirdi.
Saparbaı PARMANQUL,
«Egemen Qazaqstan»
ALMATY
