Mınıstr osy jyldyń elimiz úshin jemisti jyl bolǵanyn atap ótti. «Táýelsiz Qazaqstannyń tarıhynda 2018 jyl úlken betburystarmen este qalady. Eń aldymen, bul – Qazaqstannyń BUU Qaýipsizdik Keńesine tóraǵalyq etýi. Elimizdiń tóraǵalyǵy kezinde túrli formatta 30-ǵa jýyq otyrys ótkizilip, soǵan sáıkes mańyzdy qararlar qabyldandy», dedi D.Abaev.
Mınıstrdiń málimdeýinshe, ekinshi eleýli oqıǵa – respýblıkalyq deńgeıde jańa mıllıondy qalanyń jáne Túrkistan oblysynyń mártebe alýy. Memleket basshysynyń Túrkistandy túletý jónindegi bul sheshimin el jurtshylyǵy ǵana emes, tutas túrki jurty asa mańyzdy qadam retinde qabyldady. Al úshinshi megapolıstiń qatarǵa qosylýy demografııalyq ósimniń naqty kórsetkishi, bul qadam ekonomıkalyq jáne aımaqqa ınvestısııa tartý turǵysynan tıimdiligin qazirdiń ózinde kórsetip otyr.
Taǵy bir mańyzdy oqıǵa – Kaspıı mańy 5 memleketteri arasyndaǵy 20 jyldyq kelissózderdiń nátıjesin kórsetken «Kaspıı teńiziniń quqyqtyq mártebesi» týraly konvensııaǵa qol qoıylýy. Atalǵan mańyzdy qujat Aqtaýda ótken besinshi Kaspıı sammıtinde qabyldandy. Sol sáttegi sózinde: «Konvensııa «Kaspıı teńiziniń konstıtýsııasy» bolyp sanalady. Munda teńiz jaǵasyndaǵy memleketterdiń quqyqtary men mindetterine, sondaı-aq óńirdiń qaýipsizdigine, turaqtylyǵy men órkendeýine kepil bolýǵa qatysty barlyq keshendi máselelerdi retteý qarastyrylǵan», degen edi Elbasy.
D.Abaev osy jylǵy basty áleýmettik qoldaýdyń ózegi Elbasynyń Úndeýi bolǵanyn aıtty. Prezıdenttiń Bes áleýmettik bastamasynda halyqtyń turmysyn odan ári jaqsartýdyń naqty baǵyttary belgilendi. Atap aıtqanda, osy bastama boıynsha kommýnaldyq qyzmetter tarıfi tómendeıdi. 7 jyl boıy aspandap turǵan elektr energııasynyń tarıfterine de tosqaýyl qoıylmaq. Bul – úlken táýekel. Sonymen qatar eń tómengi jalaqy kórsetkishi bir jarym esege ósti. Jáne kelesi jyly zeınetaqy men birqatar áleýmettik járdemaqylar kóteriledi.
1 qańtardan Halyqaralyq «Astana» qarjy ortalyǵynyń resmı jumysyn bastaýy osy jyldyń aıshyqty oqıǵalary qatarynan oıyp oryn alady. Qazaqstan ekonomıkasyna serpilis ákelýdi kózdeıtin ortalyq, resmı málimet boıynsha, az ýaqyttyń ishinde ózin halyqaralyq arenada tanytyp úlgergen. Halyqaralyq reıtıng agenttikteriniń málimetterine sáıkes, ortalyq álemdik 100 qarjy ortalyǵynyń ishinde 61-orynǵa, Shyǵys Eýropa men Ortalyq Azııa óńiri boıynsha 2-orynǵa ıe bolǵan.
Habar arasynda latyn álipbıiniń jańa nusqasyn qabyldaý men «Uly dalanyń jeti qyry» maqalasynyń jarııalanýy da jyldyń aıshyqty oqıǵasy retinde atalyp ótti.
Habardy qorytyndylaı kele, mınıstr Aqparat jáne kommýnıkasııalar mınıstrligi úshin de bıyl jemisti jyl bolǵanyn jetkizdi. «Sıfrly Qazaqstan memlekettik baǵdarlamasy aıasynda aýqymdy jumys bastaldy. Astana HUB halyqaralyq IT-startaptar tehnoparki qysqa ýaqytta ashyldy. Aýyldyq jerlerde 20 myń kılometrlik iri optotalshyqty baılanys qurylysy bastaldy. Bul mıllıon turǵyndy sapaly ınternetpen qamtamasyz etýge múmkindik beredi. Aımaqtardy analogty habar taratýdan tolyq ajyratý arqyly sıfrly habar taratý júıesine birtindep kóshirý bastaldy. Memlekettik qyzmetterdiń 60 paıyzdan astamy elektrondy formatqa kóshti. О́ńirlerde sıfrly jáne kóshi-qon HQKO-lar ashylady», deıdi ol.
Sonymen qatar sóz arasynda bıometrııalyq derekterdi paıdalana otyryp qyzmetterdi alýǵa arnalǵan joba iske qosylǵanyn, medıa salasynda Astana Media Week sekildi aýqymdy sharalar men «Tumar», «Úrker» syndy BAQ qyzmetkerlerine arnalǵan ulttyq syılyqtar tabystaıtyn baıqaýlar uıymdastyrylǵanyn, qazaq tilinde «Tamasha» oıyn-saýyq telearnasy ashylǵanyn jáne joǵary reıtıng kórsetip úlgergen úzdik 10 qazaqstandyq telehıkaıa túsirilgenin tilge tıek etti.
Sóz arasynda D.Abaev qoǵamdaǵy eleýli is retinde atap aıtýǵa turarlyq oqıǵanyń biri almatylyq azamattyń adamgershilik áreketi ekenin atap ótti. Ravılıa Nasıfýlına 10 jyl boıy júıelik ákimshi retinde jumys istep, kompıýterlerdi jóndeýmen aınalysqan. Al qazir buzylǵan kompıýterler men noýtbýktardy jınap, qaıta jóndep, turmysy tómen otbasyndaǵy balalarǵa taratady eken. 10 aıdyń ishinde múgedek, qaterli isikpen aýyratyn, jetim jáne turmysy tómen otbasyndaǵy balalarǵa 70 kompıýter men noýtbýk bergen. Sóz sońynda spıker: «Osyndaı azamattar adamdy tańdandyrady, shabyttandyrady, izgilikke senýge shaqyrady», deıdi.
Aıdana ShOTBAIQYZY,
«Egemen Qazaqstan»
