Osy aralyqta ortalyq dárigerleri 2,5 myń naýqastyń júregine ashyq ádispen ota jasap, 15 myńdaı koronarlyq zertteý júrgizgen. Qazir munda jylyna 250-deı ota jasalyp, 700-deı stend, aortokoronarlyq shýnt qoıylady.
Kardıologııalyq ortalyqtyń bas dárigeri Azamat Maǵzumovtyń aıtýynsha aýrýhanada 7 bólimshe bar. 55 tájirıbeli dáriger eńbek etedi. 2008 jylmen salystyrǵanda júrek aýrýyna ushyraǵandar arasynda ólim 2,5 esege kemigen.
Júrek-qan tamyrlary keseline shaldyqqan petropavldyq Dýlat Qajkenovty aq halatty abzal jandar ólim aýzynan alyp qalǵan. Dem alysy qıyndasa da mán bermesten júre bergen. Onyń aqyry júrek qaqpashalarynyń bitelip qalýyna soqtyrǵan. Aýrýhanaǵa jedel járdemmen jetkizilgen ol úıge óz aıaǵymen qaıtqan. El Táýelsizdigi merekesi qarsańynda «Qurmet» ordenimen marapattalǵan ıntensıvti terapııa blogynyń meńgerýshisi Mıhaıl Telıýk bastaǵan dárigerler qoldan kelgen kómekterin jasaǵan.
«Búginde otanyń túr-túri jasalady. Solardyń biri –júrekke elektrokardıostımýlıator qoıý. Jylyna osyndaı 170 qyzmet kórsetiledi. Jaqynda ǵana 55 jastaǵy syrqatqa 2 kameralyq elektrokardıostımýlıator qoıylyp, ómiri 12-15 jylǵa uzartyldy. Alǵashqy jyldary 37 aortokoronarlyq shýnt jáne 100-den asa stend qoıylsa, qazir bul kórsetkishter áldeqaıda artty», deıdi bas dárigerdiń emdeý isi jónindegi orynbasary, ıntervensııalyq arıtmolog Ashat Moljigitov.
Mamandar dástúrli túrde shet elderde tájirıbe jınaqtap, bilimderin shyńdap otyrady. Bólimsheler qajetti medısınalyq qural-jabdyqtarmen tolyq qamtylǵan. Oblys ákiminiń qoldaýymen radıobólshektik ablıasııa apparaty alynypty.
Bir atap óterligi, zamanaýı jaraqtandyrylǵan kardıoortalyqtyń kómegine sheteldikter de júginedi.
О́mir ESQALI,
«Egemen Qazaqstan»
Soltústik Qazaqstan oblysy
