Osydan bolar, bıyl «Qazaqstannyń turǵyn úı qurylys jınaq banki» AQ ujymy buryn-sońdy bolmaǵan úrdis bastap, jańajyldyq merekeni Medeý muz aıdynynda qarsy aldy. Bul bastamaǵa banktiń 600-ge tarta qyzmetkeri men olardyń otbasy músheleri ortaqtasty.
Taza aýadaǵy sergek demalystyń qala turǵyndary úshin de taǵylymdy tustary bar edi. Medeýge syrǵanaýǵa barǵandar Turǵyn úı qurylys jınaq bankiniń shat-shadyman merekesiniń ortasynan tabyldy. Almatylyqtardyń taǵy bir legi aldaǵy kúnderi salamatty ómir saltyn pash etken banktiń jańa salymshylaryna aınalýy ǵajap emes.
«Búgin biz Medeý shatqalyndaǵy úlken korporatıvte ótken jylǵa esep berip, úzdik qyzmetkerlerimizdi marapattap, 2019 jyldy erekshe qarsy alýǵa sheshim qabyldadyq. Mundaı korporatıv bizdiń banktiń ıdeologııasymen tolyq úılesedi. Shaharymyzdyń keremet tórinde ujym bolyp bir kisideı saf aýada konkı teýip, sportty da nasıhattap, aıta júrerlikteı tamasha demalysty ótkerip júrmiz.
Eń bastysy, óz ómirimizdi jaqsartyp qana qoımaı, balalarymyzdyń alańsyz keleshegin qamtamasyz etip, keń ári ádemi úıler men páterlerdiń ıesi atanamyz desek, qundylyqtar júıesin ózgertý kerek. Ári muny udaıy aıtyp otyramyz. Máselen, qazir qoǵamda beleń alyp turǵan bir mezettik tutynýshylyq ıdeologııaǵa qarsylyq retinde uzaq merzimdi jınaq mádenıetin qalyptastyryp, damytý qajet. Sondyqtan osyǵan aldymen ózimiz úlgi bolyp, artyq shyǵynsyz-aq merekeni atap ótip, kóńil kóterýge bolatynyn dáleldeıik dep sheshim qabyldadyq», deıdi Turǵyn úı qurylys jınaq banki basqarma tóraıymy Lázzat Ibragımova.
Oqyrman esinde bolsa, biz buǵan deıin de banktiń Qoǵamdyq keńesi bar ekendigin, oǵan eldiń sózi ótkir tanymal jýrnalısteri, aýzy dýaly qoǵam qaıratkerleri múshe ekenin baıandaǵanbyz. Sondyqtan merekelik oqıǵaǵa otbasymen birge ortaqtasqan Qoǵamdyq keńestiń tóraǵasy, belgili jýrnalıst Sergeı Ponomarev: «Biz bul joly jańajyldyq merekemizdi tabıǵattyń tamashasy Medeý muz aıdynyna kóshirdik. Bul jerde kóńil kúı de basqa, demalys ta ózgeshe qyzyq. Al Qoǵamdyq keńestiń mindetine keletin bolsaq, biz bank salymshylarynyń múddesin qorǵaýǵa tıistimiz. Biz bank qyzmetine, jańa usynystar men ónimderge beıtarap baqylaý jasaı otyryp, bank klıentteriniń basqa da tilekterin basqarma qaperine salyp otyramyz. Qoǵamdyq keńes músheleri pikir almasa otyryp, salymshylardyń senimi men bank qyzmetiniń turaqtylyǵyna qyzmet etedi. Búgingi myna muz aıdynyna qarańyzshy, mundaǵy merekelik ahýal keremet emes pe?! Amandyq bolsa, kelesi jyly Shymbulaqqa deıin órleýimiz múmkin. Jurtqa jaı aqyl aıtqansha, aldymen óziń sol joldy bastap, salamatty ómir saltyn óziń nasıhatta. Sportpen birinshi bolyp óziń aınalys, sonda ǵana ózgeler saǵan eredi» deıdi.
Ne desek te, daraqylyq pen as ta tók dastarqandardan bas tartyp, Medeý shatqalyn ǵajaıyp merekege bólegen banktiń úrdisin shahar turǵyndary úlgili is dep baǵalady. Ári merekeniń bul túrin únemshildik pen parasattylyqtyń da bir parasy dep bilgen jón. Banktiń korporatıvtik merekesine eriksiz kýá bolǵan almatylyqtar aldaǵy ýaqytta salymshy bolýǵa septesetin jańa aqparattarǵa da qanyq boldy. Jáne jurtshylyq banktiń úzdik qyzmetkerlerin eńbegine saı Medeý tórinde marapattaǵanyn kórdi.
– Bıyl Turǵyn úı qurylys jınaq banki úırenshikti otyrystardan bas tartyp, bala-shaǵamyzben taýǵa keldik. Bul ıdeıa barsha qyzmetkerlerimizge unady. Bári qoldaı ketti. Osy arqyly biz qymbat meıramhanalarsyz da keremet demalýǵa bolatynyna kózimiz jetti. Jáne bul muz aıdynyna kelgenimiz barsha demalýshylarǵa unap jatyr. Osy bastamamyzben Medeýdegi buqaralyq sport túrin de qosa nasıhattap, jaqsy bastamalarǵa uıytqy bolyp otyrǵanymyzǵa qýanyshtymyz. Aldymen adamǵa baspanamen birge myqty densaýlyq, jaqsy kóńil kúı de kerek. Úıli bolamyn, kúıli bolamyn deseń, toı-tomalaqtarǵa shyǵyndala berýdiń qajeti joq. Ári mundaı merekeler ujymnyń aýyzbirshiligin arttyrady, – deıdi Turǵyn úı qurylys jınaq banki basqarma tóraıymynyń orynbasary Janar Jubanııazova.
Turǵyn úı qurylys jınaq bankiniń meıramyna tek qyzmetkerler ǵana emes, osy kúni Medeýge konkı tebýge kelgen Almaty turǵyndary men qonaqtary da qatysty. Jınalǵan meımandar úshin muz aıdynynda «Medeo band» mýzyka toby óner kórsetti. Sondaı-aq qyzyqty baıqaýlar uıymdastyryldy. «Turǵyn úı qurylys jınaq banki – qasań memlekettik qurylym degen oıdy ózgertkimiz keledi. 2018 jyl boıy biz klıenttermen jáne jalpy qoǵammen dıalog júrgizýdiń jańa ári erekshe formalaryn qurý boıynsha jumys júrgizdik», deıdi Lázzat Ibragımova.
Sondaı-aq kóktemde banktiń jyl saıynǵy «Jasyl meken» aksııasy aıasynda Turǵyn úı qurylys jınaq banki qazaqstandyqtardy aýlasy kógaldandyrýdy qajet etetin turǵyn úı keshenderine daýys berýge shaqyrǵan bolatyn. Sonyń nátıjesinde bank esebinen 1 myńnan astam kóshet otyrǵyzyldy. Daýys berýge 25 myńnan astam adam qatysty. Tamyz aıynda bank batyl qadam jasap, klıentterge arnalǵan sms-habarlamalardy jańa, ázil formatynda taratty. Jyl basynan beri Turǵyn úı qurylys jınaq banki qyzmetkerlerdi oqytýdyń oıyn túrindegi ádisterin sátti qoldanyp keledi. Bul eńbektiń nátıjesi retinde bank «Qazaqstan» nomınasııasynda «Ortalyq Azııanyń HR-brendi» atty bedeldi júldege qol jetkizdi. Budan bólek jaqynda Turǵyn úı qurylys jınaq banki keńesshiler jelisiniń qataryna belsendi jáne talapty adamdar tartýdy maqsat etken «Oryndalatyn mıssııa!» respýblıkalyq onlaın-oıyny aıaqtaldy. Atalǵan joba da úlken rezonans týǵyzyp, oǵan búkil elden 2 myńnan astam adam qatysty, al áleýmettik jelilerdegi oıyn boıynsha kórsetilim sany mıllıonnan asty.
Mereke sońynda Turǵyn úı qurylys jınaq banki basshylary el turǵyndaryn kele jatqan 2019 jylmen quttyqtap, ár adamǵa jańa jylda páter máselesin sheship, qonys toı toılaýdy tiledi.
Aınash ESALI,
«Egemen Qazaqstan»
ALMATY
