Oblysta qoqys óńdeıtin alǵashqy zamanaýı zaýyt Qostanaı qalasynyń irgesindegi Zatobol kentinen oryn tepti. Zaýyt jylyna 40 myń tonna qoqysty iriktep, óńdeıdi. Úsh aýysymdyq jumys kúnine kóshkende jylyna 120 myń tonna qoqys óńdep, ıgere alady. Zaýyt tolyq qýatyna úsh satylap qosylatyn bolady. Ázirge kásiporynnyń alǵashqy alǵashqy jelisi saltanatty túrde iske qosyldy. «EKO SITI KZ» jaýapkershiligi shekteýli seriktestiginiń dırektory Jandos Jaqsybaevtyń aıtýynsha, kelesi jyldyń basynda zaýyttyń ekinshi satysy, ıaǵnı tazartý jelisi iske qosylady. Úshinshi satysynda shıkizat retinde paıdalanylatyn plastık túıirshikterin óndiretin bolady.
«Bul – bizdiń oblys úshin biregeı joba. «S.M.F. – Sistem»toqymasyz materıal fabrıkasynyń áleýeti úlken, olar bizden ınfraqurylym jasaýǵa kómek surap otyr. Bul bizdi qýantady, demek kompanııanyń jospary aýqymdy degen sóz. Biz oǵan barlyq jaǵdaıda kómek beretin bolamyz. Sonymen qatar qoqystyń óńdelýi qorshaǵan ortanyń ekologııasyn jaqsartady, bul da jaqsy nyshan» dedi zaýyttyń saltanatty iske qosylýyna qatysqan oblys ákimi Arhımed Muhambetov.
Bul jobanyń alǵashqy jelisi qunynyń 300 mıllıon teńgeni qurady. Qoqys óńdeıtin zaýyt óziniń quryltaıshysy «S.M.F. – Sistem» toqymasyz materıal fabrıkasyn shıkizatpen qamtamasyz etetin bolady. Qaıta óńdelgen qoqystan fabrıka 80 túrli zat óndiretin bolady. Onyń ishinde gazǵa, sýǵa, taǵy basqa da qajetke paıdalanylatyn qubyrlar, tas jolǵa tósenishi sekildi jańa tehnologııamen óndiriske paıdalanylatyn materıaldar da bar.
Názıra Járimbet,
«Egemen Qazaqstan»
