Aqjar aýyldyq okrýginiń Jazyq stansasyna ertemen kelgen ol aýyl ishine júrgizilgen jalpy uzyndyǵy 13,5 shaqyrymdyq gaz qubyrynyń saltanatty túrde iske qosylýyna qatysty. Joba quny 105 mln teńgeden asady.
«Bıyl memleket basshysy Nursultan Nazarbaev halyqtyń ál-aýqatyn kóterýge baǵyttalǵan bes áleýmettik bastamany atady. Bastamalardyń biri eldi mekenderdi gazdandyrýǵa qatysty. Búginde Aqtóbe oblysy halqynyń 88 paıyzdan astamy gazben qamtylǵan. Sonymen birge, Hromtaý aýdany turǵyndarynyń kógildir otynmen qamtylýy 94%-dy quraıdy. Aýdannyń barlyq eldi mekenderinde gaz bar. Jýyrda qalǵan kishigirim aýyldardy gazdandyramyz. Tabıǵı gaz aýyldardyń jańǵyrýyna serpin beretinine senimdimin»,- dedi Berdibek Saparbaev quttyqtaý sózinde.
Aıta keteıik, bıyl oblysta gazdandyrý boıynsha úsh joba júzege asyryldy. Budan basqa, gazben jabdyqtaýdyń jalpy quny 6,4 mlrd teńge bolatyn 19 jobasyn júzege asyrý bastaldy. Olar 2019-2020 jyldary aıaqtalmaq. Nátıjesinde 7 myńnan astam halqy bar 14 aýylǵa gaz jetkiziletin bolady. 2020 jyldyń sońyna qaraı, oblys halqynyń gazben qamtylýy 90%-ǵa jetedi dep boljanýda.
О́ńir basshysynyń jumys sapary Dóń aýylynda jalǵasyp, ol jaqta ambýlatorııa men balabaqsha ashyldy.
Ambýlatorııaǵa kún saıyn elý emdelýshi keletin bolady. Olar úshin qaraıtyn, egiletin jáne fızıoterapııa, EKG kabınetteri, kúndizgi stasıonar men dárihana jumys jasaıdy. Mekeme sanıtarlyq avtokólikpen, barlyq qajetti medısınalyq jabydqtarmen, dárilik zattarmen jáne medısınalyq maqsattaǵy buıymdarmen jaraqtanǵan. Memlekettik-jeke seriktestik aıasynda júzege asyrylǵan jobanyń jalpy quny 92,4 mln teńge.
Oblystyń aýyldarynda memlekettik-jeke seriktestik arqyly barlyǵy 21 medısınalyq mekeme salyndy.
Jańadan ashylǵan «Tóre» balabaqshasyna 200 búldirshin baratyn bolady. ekiqabatty ǵımarattyń jalpy aýmaǵy shamamen 2 myń sharshy metr. Munda balalardyń úılesimdi damyp, tárbıelenýine jáne olardy mektepke daıyndaýǵa barlyq jaǵdaı jasalǵan.
Oblys ákimi sondaı-aq, aýdandaǵy barlyq sharýa qojalyqtarynyń asyl tuqymdy mal kórmesi ótken Ońǵar aýylynda da boldy. О́ńir basshysy kórmeni qarap shyǵyp, malshylarmen áńgimelesti, sonymen qatar, 4 myń bas usaq qara malǵa arnalǵan bordaqylaý alańy qurylysynyń birinshi kezeńiniń júzege asyrylý barysymen tanysty. Jobany júzege asyryp otyrǵan – «Danııar» sharýa qojalyǵy. Qojalyq «Sybaǵa» memlekettik baǵdarlamasyn paıdalanyp, jalpy somasy 31,4 mln teńgege bir myń bas qoı, eki traktor men eki shóp býatyn qondyrǵy satyp alǵan. Qojalyq jobany ári qaraı júzege asyrý úshin taǵy 190 mln teńge ınvestısııa salýdy josparlap otyr.
Temir QUSAIYN,
«Egemen Qazaqstan»
