Jalpy, bul shaǵyn jańa aýdandaǵy birneshe bıik úılerdiń qurylysyn «Portal-PV» JShS, «GSÝ Kurylys» JShS-tary júrgizýde.
Qonys toı qýanyshyna oblys ákimi Bolat Baqaýov, «Turǵyn úı qurylys jınaq banki» AQ basqarma tóraǵasynyń orynbasary Nurlan Aqshanov qatysyp, páter alǵan turǵyndar qýanyshtarymen bólisti.
Qala turǵyny Nazymgúl Jýkına da 2 bólmeli páterdiń kiltin qolyna alyp, qýanyshty. Ol 3 jyl buryn «Turǵyn úı qurylys jınaq banki» AQ tan esepshot ashqan eken.
-Bank 5 paıyzdyq ósimmen 9 jylǵa nesıe berdi, - deıdi páter ıesi.
Jańa turǵyn úıler «Nurly jer» memlekettik baǵdarlamasynyń aıasynda salynǵan. 1 sharshy metriniń baǵasy 120 000 teńge. Páterlerdiń aýmaǵy 40 pen 84 sharshy metr aralyǵynda.
Páter alýshy turǵyndardyń «Turǵyn úı qurylys jınaq banki» AQ shotynda úı qunynyń 20 paıyzyna teń bastapqy jarnasy bolýy qajet.
Mysaly, quny 5 mıllıon teńge turatyn 1 bólmeli páterge qol jetkizý úshin salymshylardyń esepshotynda 1 mıllıon teńge kóleminde qarajat bolsa jetkilikti.
Byltyr «Saryarqa» shaǵyn jańa aýdanynda 6 turǵyn úı paıdalanýǵa berildi. Oblystyq qurylys basqarmasynyń málimetinshe, oblys ortalyǵynyń Bas josparyna sáıkes shaǵyn aýdanda 600 balaǵa arnalǵan mektep salynady.
Burynǵy eski qalashyqtaǵy 159 úı buzylyp, bul aýmaq qazir qyzý qurylys alańyna aınaldy.
Turǵyn úıler kesheniniń qurylysy 2021 jyly aıaqtalady dep josparlanǵan. Sonymen birge, «Nurly jer» baǵdarlamasy boıynsha oblys ortalyǵynda «Dostyq» shaǵyn aýdanynyń da qurylysy bastaldy.
Farıda BYQAI,
«Egemen Qazaqstan»
PAVLODAR
