Týǵan qalany túletý úshin jasalynǵan 32 joba «Týǵan jer» arnaıy jobasynyń «Atameken» kishi baǵdarlamasy sheńberinde júzege asyrylǵan. Bul maqsatta demeýshiler men mesenattar esebinen 1,6 mlrd teńge bólingen. Igi bastamalardyń basynda «Otaý grýpp» JShS men «Atameken» korporasııasy tur. Atalǵan mekeme memlekettik-jekemenshik áriptestik aıasynda quny 280 mln teńgeni quraıtyn, 110 oryndyq ınklıýzıvti bilim berý ortalyǵyn salyp berdi. Al «Atameken» korporasııasy 547 mln teńgeni quraıtyn 320 oryndyq balabaqsha qurlysyna kómek kórsetken.
Ult kóshbasshysynyń baǵdarlamalyq maqalasyndaǵy «Tárbıe jáne bilim» baǵyty boıynsha Shymqalada 138 is-shara uıymdastyrylyp, qaladaǵy 94 mektepte robot-tehnıkasy kabıneti ashyldy. 164 oqytýshy tıisti kýrsta bilimin jetildirdi. Sonymen qosa «Rýhanı qazyna» baǵdarlamasy boıynsha Shymkenttegi qasıetti, kıeli oryndar men týrıstik mańyzy bar eskertkishterge, jalpy sany 18 nysanǵa QR kodtar ornatyldy. «Otyrar» kitaphanasynan kovorkıng ortalyǵy ashyldy. «Ádebı ólketaný» jobasy aıasynda túrli konkýrstar, kezdesýler, aıtystar, ashyq sabaqtar, konferensııalar men semınarlar ótkizilip, kitaptar basyp shyǵaryldy.
Prezıdenttiń qazaq tili álipbıin kırıllısadan latyn grafıkasyna kóshirý týraly tapsyrmasyna oraı Shymkentte latyn qarpindegi qazaq álipbıin nasıhattaý jumystary da belsendi júrgizilip keledi. Shymkenttegi birqatar basylymdarda latyn qarpinde jazylǵan maqalalar basylyp, qala boıynsha osy reformaǵa arnalǵan 75 banner ilingen. Sonymen qatar, qaladaǵy joǵary oqý ornynyń basshylary, oqytýshylar, professorlyq quram men zııaly qaýym ókilderiniń qatysýymen «100 jańa oqýlyq» jobasy aıasynda álemdik deńgeıdegi qalamgerlerdiń, sarapshylardyń qazaq tiline aýdarylǵan 18 oqýlyǵyn tanystyrý jıyny ótti.
Nurshat TО́KEN,
«Egemen Qazaqstan»
