«Túbirtekti talap et – júldeni utyp al» aksııasy 21 mamyr 30 qarasha aralyǵynda ótti. Osy kezeńde barlyq oblystar men Astana jáne Almaty qalalarynda júldeler tabystaldy. Uıymdastyrýshylar aksııanyń alty aıy ishinde 30 myń azamattan shamamen 2,3 mln túbirtek alǵanyn aıtady. Túbirtekterdiń basym bóligi Almaty qalasy men Túrkistan oblysynan jiberilgen. Jıyn barysynda sóz alǵan Qarjy mınıstrligi Memlekettik kirister komıtetiniń Tóraǵasynyń orynbasary A.Qypshaqov aksııa bastalǵaly beri Respýblıka boıynsha 300-ge jýyq baǵaly syılyq oınatylǵanyn aıtty.
«Atalǵan aksııany biz osymen tórtinshi jyl ótkizip otyrmyz. Osy aksııa azamattarǵa bir ýaqytta kásipkerlik sýbektileriniń salyqtyq zańnamasyn saqtaý boıynsha qoǵamdyq baqylaýǵa belsendi qatysýyna jáne baǵaly júldeler utyp alýǵa múmkindik bergenin atap ótý qajet», dedi ol.
Budan soń, túbirtek arqyly júldeli bolǵandar tikeleı efırde kezdeısoq sandar generatorynyń kómegimen belgili boldy. 360 teńgeniń túbirtegimen Almaty oblysy, Ile aýdany, Baıserke aýylynyń turǵyny Kakenova Orynbala jeńil avtokólik utyp aldy. Ol aksııaǵa barlyǵy 2516 túbirtek jibergen. Astana qalasynyń turǵyny Ysqaqova Uldaı aksııaǵa barlyǵy 2425 túbirtek jiberip, 585 teńgeniń túbirtegimen televızor utyp aldy. Sondaı-aq Almaty qalasynyń turǵyny Ohanova Aınur 429 teńgeniń túbirtegimen planshet utyp aldy. Ol barlyǵy 1196 túbirtek jibergen.
Aksııa barysynda 91 myńnan asa túbirtek jibergen Túrkistan oblysynyń turǵyny Janar Qozǵambaeva «Eń belsendi qatysýshy» atanyp, planshet utyp aldy. Sonymen qatar BKM qoldaný tártibin Qoǵamdyq baqylaý negizinde Azamattyq ustanymyn kórsetkeni úshin Almaty qalasynyń turǵyny Shın Antonǵa uıaly telefon syıǵa berildi.
Marjan TILEÝBEK,
«Egemen Qazaqstan»
