Elbasynyń tapsyrmasyna sáıkes, oblystaǵy 48 naryq sýbektileriniń 58 qyzmet túri boıynsha tarıfteri tómendetildi. Tómendetilgen tarıfter 2019 jyldyń 1 qańtarynan bastap qoldanysqa engiziledi. Nátıjesinde halyqtyń kommýnaldyq qyzmetke tóleıtin qarajatyn únemdeý shamamen 1,15 mlrd. teńgeni quraıdy. Bul týraly Túrkistan oblysynyń óńirlik kommýnıkasııalar qyzmetinde ótken brıfıngte oblystyq monopolııaǵa qarsy departament basshysy Erbolat Ybyraıhanov málimdedi.
Onyń aıtýynsha, oblysta elektr energııasyn tasymaldaý tarıfi 2019 jyldyń 1 qańtarynan bastap 10,2 paıyzǵa, ıaǵnı 1 kılovat saǵatqa 7,38 teńgeden 6,64 teńge deıin túsetin bolyp otyr.
«Tasymaldaý jáne óndirýshi stansııalardyń tarıfiniń tómendeýi esebinen túpkilikti tarıftiń tómendeýi 6,8 paıyzdy kuraıdy, ıaǵnı halyqqa 14,48 teńgeden 13,49 teńgege deıin tómendeıdi. Sonymen qatar, 2019 jyldyń 1 qańtarynan bastap tutynýshylardyń qordalanǵan qaryzy úshin elektr energııasynan qaıta qosý tólemi 40 paıyzǵa tómendetiledi», dedi Erbolat Maqsuthanuly.
Tabıǵı gazben qamtamasyz etý salasy boıynsha 2019 jyldyń 1 qańtarynan bastap tasymaldaý jáne kóterme baǵa túsý esebinen halyq úshin gaz tarıfi 5,8 paıyz tómendetilip, 1 tekshe metrge jeke tulǵalarǵa – 32,47 teńge, al halyqty jylýmen qamtamasyz etetin zańdy tulǵalarǵa – 28,27 teńgeni quraıtyn bolady.
Sondaı-aq, jylýmen jabdyqtaý qyzmeti boıynsha oblysta ortalyqtandyrylǵan jylýmen qamtamasyz etetin 6 memlekettik kommýnaldyq kásiporyn bar. Kómir otynyn qoldana otyryp jylý energııasyn shyǵaratyn mekemeler tarıfin 7-24 paıyz aralyǵynda túsirip otyr. Qalǵan 2 mekeme tabıǵı gazdy qoldana otyryp jylý energııasyn óndiredi. Bul Saryaǵash jáne Tólebı aýdandaryndagy mekemeler. Gaz otynyn qoldana otyryp jylý energııasyn shyǵaratyn mekemeler tarıfin 11-15 paıyz aralyǵynda túsirmek.
Budan ózge, aýyz sý, aǵyn sý jáne sý burý qyzmetimen aınalysatyn sýbektildiń ishinen 2019 jyldyń 1 qańtarynan bastap 39 sýbektiniń tarıfteri 5–13 paıyz aralyǵynda tómendetiletin bolady.
