Egemendik ardager jýrnalıst jetpis jasqa tolǵaly otyr. Sol sebepti gazet ujymy mereıtoı ıesine qurmet kórsetip, tartý-taralǵysyn usyndy.
Kezdesýge J. Soltıevanyń shyǵarmashylyq jolyndaǵy áriptesteri men dos-jarandary arnaıy keldi. Olardyń ishinde qoǵam qaıratkerleri Saırash Ábishqyzy men Orazkúl Asanqyzy, jazýshy-jýrnalıst Janat Elshibek, Qaısar Álim, Súleımen Mámet jáne ánshi-sazger Elena Ábdihalyqova boldy. «Egemen Qazaqstan» gazetiniń tóraǵasy Darhan Qydyráli qurmetti qonaqty týǵan kúnimen quttyqtap, qazaqy saltpen ıyǵyna kamzol japty.
Áriptesteri ótken kúnderdiń ónegeli estelikteri men ótkeleń shaǵy týraly syr shetti. Birge júrip, birge eńbek etken ujym músheleri apamyzǵa aqjarma tilek aıtyp, lebiz bildirdi. Al jas tilshiler maǵynaly áńgimege qanyqty.
Jumagúl Soltıeva 1948 jyly 27 jeltoqsanda Almaty oblysy, Jambyl aýdany, Qastek aýylynda dúnıe esigin ashqan. QazMÝ-diń jýrnalıstıka fakýltetin bitirgen ol «Lenınshil jas» (qazirgi «Jas Alash»), «Sosıalıstik Qazaqstan» (qazirgi «Egemen Qazaqstan»), «Zaman-Qazaqstan» gazetteri men «Baldyrǵan» jýrnalynda bólim meńgerýshisi, «Qazaqstan áıelderi» jýrnalynda bas redaktordyń orynbasary, bas redaktor bolyp jumys istegen. Keıinnen «Egemen Qazaqstan» gazeti bas redaktorynyń orynbasary qyzmetine kelip, osynda zeınetke shyqqan.
Shyǵarmashylyqtan qol úzbegen Jumagúl Qýanyshbekqyzy áli de mazmundy týyndylar jazatynyn jetkizip, gazet ujymyna alǵysyn aıtty.
Janbolat KENJEǴUL
Fotoǵa túsirgen Erlan OMAR
«Egemen Qazaqstan»
