Zaman ózgerip, zań túrlengende de qazaq balasynyń áıel zatyna qurmeti ózgermedi. Biraq joly jińishke qyz balasynyń sóz ónerindegi joly jazýshy sózimen aıtqanda, tipti qyldyryqtanyp ketti. Áıel zatynyń úlken jazýshy, jýrnalıst bolýyna senimsizdikpen qaraǵandar da bolsa kerek. Biraq osy sózdiń semip qalǵan túsinigin buzǵan qazaqtyń qalamger qyzdarynyń biri Jumagúl Soltıevanyń kelbetin tanyǵan saıyn sol senimsizdik jadaǵaı oıdan týǵan jattandy sózdeı seziledi búgin. «Egemen Qazaqstan» gazetiniń shańyraǵynda gazet ardageri, belgili jýrnalıst, jazýshy, dramatýrg Jumagúl Soltıevanyń
70 jasqa tolý qurmetine oraı saltanatty jıyn ótti. «Dástúri berik ujymnyń baǵdary aıqyn. Ǵasyr jasap otyrǵan ata basylymnyń burynnan qalyptasqan jolyn, urpaqtar sabaqtastyǵyn saqtap, óz ardagerlerimizdi qashanda qurmettep syılap júremiz. Sizderdiń salǵan dara joldaryńyzben keıingi óskeleń urpaq jańylmaı júre alady. Sizder aıtqan sóz bizge – ónege, jastarǵa – úlgi. О́zińizdiń ujymyńyzdyń atynan quttyqtaýymyzdy qabyl alyńyz» dep «Egemen Qazaqstan» AQ basqarma tóraǵasy Darhan Qydyráli quttyqtaý sózin aıtyp, ardager qalamgerimizdiń ıyǵyna kamzol japty. Jumagúl Soltıevany quttyqtaýǵa zamandastary men syılastary keldi. Janat Elshibek, Saırash Ábishqyzy, Súleımen Mámet, Qaısar Álim, Orazgúl Asanǵazy, Elena Ábdihalyqova sııaqty sóz sańlaqtary jyly lebizderin arnady.
«Osy Astanany Arqaǵa kóshirip, baǵanaly orda qurǵan Elbasyna rızamyz. Astanaǵa kelgenge deıin syrttaı syılasyp, jylyna bir-eki ret sóılesetin Jumagúlmen osy Astanaǵa kelgen soń, qoıan-qoltyq aralasyp, jumys istedik. Jumagúl dese, meniń kóz aldyma Baýyrjan Momyshuly, Sherhan Murtaza elesteıdi. «Qyzdardan jýrnalıst shyqpaıdy» degenderdiń sózin joqqa shyǵarǵan úrkerdeı toptyń mańdaı aldynda júrgen zamandasymyz. Jýrnalıstkasynan bólek dramatýrgııasy da kópshiliktiń kóńilin jadyratty. Maǵjannyń Zylıhasyn qalaı sheber sahnaǵa shyǵardy. Bul kúlli Alash qaıratkerleriniń jarlaryna qoıylǵan eskertkish dep oılaımyn. Keshegi jeltoqsanda erlik kórsetken Qaırat Rysqulbekovtiń qyzdarǵa jazǵan hatyn «Qazaqstan áıelderine» jarııalady. Iаǵnı Jumagúl qashanda ultqa kerek qazynalardy arshyp júredi. Osy úshin saǵan halqyń da razy» dep quttyqtaýyn jetkizdi qoǵam qaıratkeri Orazgúl Asanǵazy.
Sóz sońynda Jumagúl Soltıeva da ózi istegen qarashańyraqqa peıil, kóńilderi úshin alǵysyn jetkizdi. Jumagúl apaı «Iаpyraý» ánin jas kúninde jıi aıtyp, keremet jaqsy kóredi eken. «Kóńil kóńilden sý ishedi». Jaqsy lebiz, áıbat quttyqtaýlardy estip, kóńili marqaıǵan Jumagúl apamyz qanatynyń astyna marjan taǵyp, ándetip ketip bara jatqan joq pa eken...
Baǵashar TURSYNBAIULY,
«Egemen Qazaqstan»
