Spartakıadanyń saltanatty ashylýyna qatysqan mektep dırektory Ermek Paızov, «Nazarbaev Zııatkerlik mektepteri» DBBU ujymynyń basyn qosyp, birligin arttyratyn spartakıadalardyń mańyzdylyǵyn atap ótip, qatysýshylarǵa sáttilik tiledi.
- Aqtaý qalasyndaǵy zııatkerlik mektep alǵash ret jelilik spartakıadany uıymdastyryp otyr. Sol sebepti atsalysqan barsha áriptesterimizge alǵysymyzdy bildiremiz, dedi Ermek Serikuly.
Saıystyń alǵashqy kúni qurama komandalar voleıbol, darts, shahmat, ústel tennısinen baq synasa, ekinshi kúni komandalar fýtbol oıynymen jarysty.
- Kıeli Mańǵystaý jerinde ótken spartakıadaǵa qatysqanymyzǵa shyn júrekten qýanyshtymyn. Mundaı saıystar elimizdiń ár qıyryndaǵy áriptesterdiń basyn qosyp, yntymaqtastyǵyn arttyryp, tájirıbe almasýǵa taptyrmas múmkindik. Dene shynyqtyryp qana qoımaı, komandada jumys isteý qabiletterimiz shyńdala tústi, deıdi Oral qalasyndaǵy Nazarbaev Zııatkerlik mektebiniń pedagog-kýratory Gúlnar Serjanova spartakıada jaıynda.
Eki kúnge sozylǵan saıys nátıjesinde jalpykomandalyq esepte Aqtaý qalasyndaǵy zııatkerilk mektep ujymy spartakıada kýbogyna ıelense, Oral qalasyndaǵy Zııatkerlik mektep ujymy ekinshi orynmen marapattaldy. Al Shymkent qalasyndaǵy fızıka-matematıka baǵytyndaǵy Nazarbaev Zııatkerlik mektebi úshinshi orynǵa laıyqty dep tanyldy.
Saıys sońynda uıymdastyrýshylar qurama komanda jetekshilerine Mańǵystaý oblystyq Sport basqarmasynyń alǵys hatyn tabys etti.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
