Vera hanymnyń aıtyp ótkendeı, Zhas project jastar korpýsyn damytý – Dúnıejúzilik banktiń jáne Bilim jáne ǵylym mınıstrliginiń birlesken jobasy.
– Úılestirý agenttigi ótken jyly qanatqaqty joba retinde Qaraǵandy, Pavlodar, Ońtústik Qazaqstan jáne Almaty oblystarynda ony júzege asyrýdy qolǵa alǵan bolatyn. Sóıtip, osy 4 aımaqta 18-29 jas aralyǵyndaǵy eki myńǵa jýyq jastardy qamtydyq. Olar áleýmettik ıdeıalardyń negizinde 589 joba usyndy. Granttyq baıqaýǵa qatysý úshin jastar 3-5 adamnan turatyn toptarǵa birigip, bizdiń saıtta ornalasqan talaptarǵa sáıkes elektrondy túrde ótinish bere alady. Qatysýshylarǵa qoıylatyn negizgi talaptarǵa toqtalar bolsam, jastar joba júzege asyrylatyn aımaqta turýy qajet. Olardyń jas mólsherine, qolǵa alǵan bastamalaryna qajetti qujattarynyń túgel bolýyna qatysty da talaptar bar. Árıne, eń bastysy, ynta-yqylasyna kelip tireledi. Bıyl Qostanaı, Shyǵys Qazaqstan, Soltústik Qazaqstan, Aqtóbe, Jambyl jáne Qyzylorda syndy 6 oblys qosyldy. Kelesi jyly qalǵan tórt oblysty jáne Astana men Almatyny tartamyz. Osylaısha, biz úsh jyldyń ishinde búkil Qazaqstan jastary múmkindiginshe «Zhas project» jobasynyń qaıtarymsyz granttaryna ıe bola alady,– deıdi ol.
Bıyl grantqa úmitker adamdardyń jas shekteýine azdaǵan ózgeris engizilip, 14-29 jas aralyǵy qamtylypty. Aıta keterligi, grantty alý úshin keremet ınnovasııalyq jańalyq tabý qajet emes. Qarapaıym mysal úshin aıtsaq, aýylda shaǵyn naýbaıhana ashýy usynǵan jastarǵa da qoldaý jasalady. Eń bastysy, elge de, isker azamattyń ózine de paıdasyn tıgizse bolǵany. Joba júzege asyrylatyn alty aı ishinde jastar shákirtaqymen qamtamasyz etilip, tıisinshe aýyl turǵyndaryna nandy aqysyz taratýy kerek. Jobanyń áleýmettik dep atalýy da osydan kelip týady.
Mal jáne qus sharýashylyǵy, aǵylshyn tilin oqytý, tigin sehtary, basqa da kóptegen áleýmettik baǵyttaǵy jobalar bar. Berilgen grantqa satyp alynǵan jabdyqtar nemese tórt túlikterdiń bári ózderinde qalady. Iаǵnı, olar óz isin ári qaraı damytýǵa múmkindik alady.
– Bir qyzyq joba boldy. Almaty oblysynda eti tiri, pysyq jastar birigip, biraz sıyr satyp alyp, sútin aýyl aýyl turǵyndaryna taratypty. Bir qaraǵanda jaı ǵana mal sharýashylyǵy sııaqty. Keıin zerttep kórsek, bul aýylda mólsherde kalsıı men basqa da dárýmenderdiń jetispeýshiligine baılanysty súıek júıesi aýrýlaryna shaldyqqan adamdar basqa óńirlermen salystyrǵanda. Demek, ony qoldaý kerek, – deıdi Vera Aleksandrqyzy.
Ippoterapııa, ıaǵnı, salt atpen júrý arqyly emdeý ádisin qolǵa alǵandar da bar eken. Jalpy, medısınaǵa qatysty kez kelgen jobaǵa úılestirýshi top erekshe saqtyqpen qaraıdy. Teksere kelgende, ıppoterapııany qolǵa alýshy azamattyń barlyq tıisti qujattary túgel ekendigi anyqtalypty. Jas jigit Máskeýde medısınalyq ýnıversıtet bitirgen bilikti maman bolyp shyqqan. Aýyldyq jerlerde osyndaı arnaıy bilimi bar mamandardyń bar bolýy óte mańyzdy. Qazir onyń kómegine júgingen biraz naýqas balalar dertine shıpa taýyp, ata-analary alǵysyn jaýdyryp turady.
– Osyndaı paıdaly ister óz nátıjesin berip jatqanyn kórgende biz beker jumys istemeıtinimizdi túsinemiz. Biz árbir qatysýshynyń ómiriniń oń baǵytqa ózgerýine jáne olardyń armandaryna jetý úshin alǵashqy qadamdaryn bastaýyna, qoǵamnyń máselelerin sheshýge at salysýyna yqpal etkimiz keledi,– deıdi V.Kım.
Baıqaýymysha, árbir joba tek jastardyń ózine ǵana emes, olar ómir súretin qoǵam úshin mańyzdy. Jobada jumys istegen alty aı ishinde jastar ózderine paıdaly kóp nárseni úırenedi. Al qabileti bar azamaty ary qaraı basqa da qyzmette óziniń jumysyn kórsete alatyny sózsiz. Demek, olardy qoldaý úshin atqarylǵan jumys, tógilgen ter tekke ketpegeni.
Aslan QANǴOJIN
