MEGA Silk Way – oıyn-saýyq ortalyǵyna jınalǵan 500 balaǵa syılyq tabystaldy jáne olardy Aıaz ata, Aqshaqar, Jalmaýyz kempir men zamanaýı mýltfılm keıipkerleri – transformerler, mınondar, aıý, temir adam kele jatqan Jańa jylmen quttyqtady. Merekeni ınklıýzıvti alańda qarsy alǵan balalar daýn, aýtızm sındromdary, spina bifida, qımyl-tirek apparatynyń kúrdeli zaqymy, obyr (DSP) aýrýlarymen kúresip keledi. Aıta keteıik, oıyn-saýyq ortalyǵyndaǵy alań qoǵamdyq qorǵa tegin usynyldy.
2015 jyly qurylǵan «Asyl bala» respýblıkalyq qaýymdastyǵy óz jumysynda negizgi úsh prınsıpti ustanady. Birinshisi – densaýlyǵy erekshe kútimdi talap etetin balalarǵa qamqorlyq kórsetý jáne qarjylaı kómektesý, ekinshisi – aýrýhanalardy eń qajetti jabdyqtarmen qamtamasyz etý jáne qazaqstandyq dárigerlerdiń biliktiligin arttyrýǵa atsalysý, úshinshisi – qaýymdastyqqa múshe bolǵan úkimettik emes uıymdarǵa memlekettik organdarmen qarym-qatynas ornatýǵa kómektesý jáne elimizde ǵana emes, álemde emdeý təsilderi qarastyrylmaǵan aýrýlarǵa shaldyqqan balalardy saýyqtyrý metodıkalaryn qurastyrý», dedi «Asyl bala» qoǵamdyq qorynyń baspasóz qyzmetshisi Gaýhar Omarbek.
Joǵaryda atap ótken úsh prınsıptiń ásirese sońǵysy elimizdegi búldirshinder men olardyń ata-analary úshin aýadaı qajet. Sondyqtan «Asyl bala», «Mır ravnyh vozmojnosteı», «Solnechnyı mır», «Mıkrotııa jáne atrezııa», «Co-make», «Raznye detı», «Spina Bifida», «Orda», «Olımpıonık», «Marsana», «QARABEKOV», «Nomad Star» jáne «Karate-do federasııasy» sııaqty úkimettik emes uıymdarymen osy baǵytta tyǵyz jumys isteýde. Iаǵnı týǵannan bastap aýtızm, daýn sındromy, spina bifida (omyrtqanyń jáne júıke tamyr tútiginiń damýyndaǵy týa bitken patologııa), mı saldanýy aýrýlaryna shaldyqqan balalardy ońaltý ortalyqtaryn tek qarjylandyryp qana qoımaı, olardyń jumys tásilderin zerttep, elimizdiń ózge óńirlerine taratýdy qolǵa alǵan.
Raýan QAIDAR,
«Egemen Qazaqstan»
