Qostanaı oblystyq polısııasy Basqarma shtabynyń bastyǵy Meıram Qajkenovtyń aıtýynsha, Reseı men Qostanaı oblysy Quqyq qorǵaý organdary qyzmetkerleri qylmyskerlerdi quryqtaýda kóptegen jyldar boıy tyǵyz baılanysta jumys istep keledi. Ásirese, polıseıler kólik urlyǵyn áshkerelegende tize qosyp áreket etedi.
«Qostanaı oblysynyń Reseımen shekarasy 1242 shaqyrymdy quraıdy. Sol arqyly kólik tasqyny ári-beri ótip jatady. Sondyqtan kórshi, shekaralas oblystar polıseılerine qylmyspen kúreste jedel áreket etý úshin aqparatty der ýaqytynda habarlap otyrý kerek» deıdi Meıram Qajkenov.
Polıseılerdiń eki jaqty kezdesýinde kórshi memleketterden kólik urlaýdyń jolyn jabý úshin birlesken jedel-izdestirý sharalaryn úzdiksiz júrgizýge sheshim qabyldady. Sondaı-aq qylmyskerlerdi jáne iz-túzsiz joǵalǵandardy izdestirýde, esirtki bıznesimen kúresýde eki jaqty yntymaqtasa jumys isteýdiń keshendi máseleleri jete qaraldy. Qostanaı oblystyq polısııa departamenti Qylmystyq polısııasy basqarmasy bastyǵynyń orynbasary Erbol Taıbekov mundaı basqosýlardyń oń nátıje beretindigin, eki jaqty yntymaqtasa jumys isteýdiń negizgi tetiginiń biri jedel aqparat almasý men ony jetildirip, keshendi júzege asyrý ekenin aıyryqsha aıtty. Sondyqtan aldaǵy ýaqytta da úzdik tájirıbeler almasý jáne yntymaqty jumysty úzbeý kerektigin eki el polıseıleri de atap ótti.
Kezdesý sońynda quqyq tártibin retke keltirip otyrýdaǵy kóptegen ortaq mindetterdi júzege asyrý úshin Protokolǵa qol qoıyldy.
Názıra Járimbet,
«Egemen Qazaqstan»
Qostanaı
