«Eń tereń saıası astaryn túsinetin ýaqyt keldi. Eń basynda biz ony aıta almadyq. Jaǵdaı ártúrli boldy. Eldiń ishinde jurtymyzdyń ózi birińǵaı emes, ár taraptan boldy. Sonyń bárin eskere otyryp, ekinshi jaǵynan qıyn-qystaý jaǵdaıda elge jańa jol silteý úshin bir osyndaı jańalyq kerek boldy. Árıne men bastaǵan kez óte qıyn edi. Bir qalany salyp, astanany bir jerden ekinshi jerge kóshirý degen óte qıyn. Sonyń barlyǵyn oılap kelip, burynǵy astanalardyń kóshý tarıhyn qarap, qalaı jasaıtynyn bilip, ǵylymı turǵydan kelgende astana eldiń qaı jerinde bolýy kerek degen máselemen keldik. Dál kindik ortasy – Jezqazǵan. Jezqazǵanǵa da, Ulytaýǵa da bardym. Jol da, temirjol da joq. Energetıka da joq. 20 jyl Temirtaýda jumys istedim. Qaraǵandyny jaqsy bilemin. Kómirdiń ortasyna, ekologııasy qıyn jerge aparý....Kókshetaýǵa barsaq shetke shyǵyp ketemiz, Aqtóbege barsaq batysqa jaqyndaımyz. Sondyqtan, oılanyp-tolǵanyp tórt joldyń toraby retinde Aqmolany tańdadyq», dedi Nursultan Nazarbaev.
Prezıdent daladaǵy aıazǵa qaramastan eshqandaı jamandyq joq ekenin aıtty.
«Bir jerde ystyq, bir jerde sýyq. О́zimizdiń elimiz, jerimiz. Saryarqanyń ortasy, ata-babalarymyzdyń tuıaqtary tıgen jer. Malyn jaıǵan jer. Sondyqtan munyń kóp paıdasy boldy. Birinshiden, halyq kóp shoǵyrlanǵan ońtústikten soltústikke qaraı mıgrasııany kúsheıttik. Qazir Túrkistandy oblystyń ortalyǵy degennen keıin Astananyń turǵyndary qaljyńdaıtyn kórinedi. Shymkenttikter bizge kelmeı, Túrkistanǵa baratyn boldy ǵoı dep. Ár nárseniń aıaǵyna qaraý kerek qoı. Saıasattyń adamyna oılaǵan oıyń iske asyryp, aıaǵynda jemisin kórgennen artyq baqyt joq», dedi Elbasy.
Sondaı aq N. Nazarbaev búgingi tańda Astananyń dúnıejúzine tanymal qala bolǵanyn aıta kele, astanalyqtarǵa barlyq jaǵdaı jasalǵanyn tilge tıek etti.
«1 mln 200 myń halqy bar. 30 jyldarǵa qaraı 2 mln bolatyn shyǵar. Basynda 5-8 qabattan turatyn qala salsam ba dep oılap edim. Myna keń dalada bıigirek bolmasa kórinbeı qalady dep sáýletshiler boı bermeı saldy. 230 metrlik «Abý Dabı Plaza» salynyp jatyr. Bul postkeńestik elderdegi eń bıik ǵımarat bolady. Mádenıet oshaqtar bar, bilim oshaqtary bar, densaýlyq saqtaý mekemeleri bar. Qazir astanalyq turǵyn úshin barlyǵy bar. Eshqandaı Parıj, Berlınge barýdyń qajeti joq. Barlyq kerekti nárse osynda bar. Tek aqsha taýyp, ómir súrý kerek. Astanamyzdy kórkeıte berý kerek», dedi Prezıdent.
