Nursultan Nazarbaev jyl qorytyndysy boıynsha BAQ ókilderine bergen suqbatynda eń aldymen Astana qalasynyń 20 jyldyq mereıtoıyna toqtaldy.
«Birneshe jyldar buryn Astana qalasynda eshteńe joq edi. Al qazirgi Astananyń kórkine kóz toımaıdy. Sol kezde búgingi bas qalanyń ásem qala bolaryna senbegender boldy. Alaıda eren eńbektiń arqasynda Astananyń búgingi kelbeti shyndyqqa aınalyp otyr. 20 jyldyq degenimiz tarıh úshin túk emes. Astana óziniń damý jolynda eldiń ózge aýmaqtaryn da alǵa tartty», dedi Elbasy óz sózinde.
Budan soń, ol Batys Qazaqstan aýmaǵynda ornalasqan qalalardyń damý jumystaryn atap ótti.
«Atyraý qalasy alǵashqy kezeńnen kóp ózgerdi. Birneshe jyl buryn bul qalada rázińke etiksiz aıaq alyp júrýge de bolmaıtyn edi. Al búginde Atyraý tamasha qalaǵa aınalyp otyr. Sondaı-aq Aqtaý qalasyn erekshe atap ótkim keledi. Bul qalada bıyl Kaspıı máselesine qatysty birneshe eldiń basshylarymen úlken sammıt ótti. Tamasha jaǵalaýy bar qala búginde kóńil qýantady. Bul qalanyń búginde mártebesi asa túsip otyr. Atyraý elimizdiń úzdik týrızm aımaǵy bolýǵa ábden laıyq. Oral, Aqtóbe qalalarynyń da qarqyndy ósý jumystaryn atap ótpeske bolmaıdy. Aqtóbe qalasynda 130 myń adam turatyn jańa 3 yqsham aýdannyń jandaný jumystary qarqyndy júrip jatyr. Bul aımaqtyń áleýmettik jaǵdaıy búginde birshama jaqsarǵan», dedi Memleket basshysy.
Sondaı-aq Elbasy Qostanaı, Taldyqorǵan, О́skemen, Petropavl, Almaty qalalaryna jeke-jeke toqtalyp, elimizdegi qalalardyń Astana qalasyna qarap boı túzeıtinin aıtty.
«Elimizdiń barlyq qalalary bas qala Astana qalasyna qarap boı túzeıdi. Bul tendensııa endi shaǵyn qalalar men aýdandarǵa da enip jatyr. Bıyl Astananyń 20 jyldyq mereıtoıynda barlyq oblystar atsalysty. Ár oblys bul qalanyń damýyna ózindik úles qosty», dedi Prezıdent.
