– Álemde elimizdiń bedeli aıtarlyqtaı nyǵaıa tústi. Qazaqstanǵa tartylǵan ınvestısııa kólemi 17,5 paıyzǵa artty. Jalpy, ekonomıkamyz 4 paıyzdan astam ósti. Bul – birlese atqarǵan jumysymyzdyń nátıjesi. Sondyqtan, barlyǵyńyzǵa alǵys aıtamyn, – dedi Qazaqstan Prezıdenti.
Sonymen qatar, Memleket basshysy aldaǵy jyly elimizdi odan ári damytýǵa septigin tıgizetin kóptegen sharalar ótetini jóninde aıtty.
– 2019 jyldan bastap eń tómengi jalaqy 1,5 ese ósedi. Bul 1,3 mıllıon adamdy qamtıtyn bolady. Biliktiligin rastaǵan muǵalimderdiń eńbekaqysy 30 paıyzdan 50 paıyzǵa deıin kóbeıedi. Quqyq qorǵaý organdarynyń qyzmetin jaqsartýdy kózdeıtin jumystar atqarylady. Týrızmdi ilgeriletý úshin de sharalar qabyldanady, – dedi Elbasy.
Nursultan Nazarbaev keler jyly jastardyń áleýetin damytýǵa erekshe mán beriletinin aıtty.
– Jastarǵa arnalǵan arnaıy memlekettik baǵdarlama tórt mindetti júzege asyrýǵa baǵyttalady. Bul – bilim berý, baspanamen qamtamasyz etý, densaýlyq saqtaý jáne patrıottyq tárbıe berý máseleleri. Búgingi jumystardyń bári bolashaǵymyz úshin jasalýda. Jastardyń basty ómirlik baǵdary elimizdiń táýelsizdigi bolýǵa tıis, – dedi Memleket basshysy.
Sońynda Elbasy sharaǵa qatysýshylardy kele jatqan Jańa jylmen taǵy da quttyqtap, barsha qazaqstandyqtarǵa zor densaýlyq, baq-bereke men tabys tiledi.
Jańa jylǵa arnalǵan keshti ótkizýden túsken qarajat qaıyrymdylyq maqsatqa jumsalatyn bolady.
