Oqý-jıyndar – Qarýly Kúshterdegi túrli deńgeıdegi komandırlerdiń daıarlyǵyn jetildirýdegi eń tıimdi joly bolyp tabylady. Osy kúnderi jeltoqsan aıynyń basynda bastalǵan óńirlik qolbasshylyqtyń vzvod komandırlerimen ótkizilgen jıyny aıaqtaldy. Jıynǵa motoatqysh, tank, artıllerııa, barlaý vzvod komandırlemen qatar ınjınerlik, baılanys, tehnıkalyq jáne tyldyq vzvod komandırleri qatysty.
Jıynnyń basty maqsaty kásibı daıyndyq pen bilimdi jetildirý, mashyqtylyqty arttyrý, kartamen jáne basshylyq qujattarmen jumys jasaýdaǵy, sheshim qabyldap, tapsyrmany qoıý dárejesin jańa deńgeıge shyǵarý bolyp kózdeldi. Ofıserler teorııalyq jáne praktıkalyq sabaqtarmen qatar, nusqaýlyq, baqylaý sabaqtaryna da qatysty. «Batys» óńirlik qolbasshylyǵy áskerleriniń qolbasshysy general-maıor Qanysh Abýbakırovtyń nusqaýymen zańsyz áskerı qurylymdardyń is-áreket taktıkasy, jaýyngerlik buıryqty berý kezindegi usynystar boıynsha qosymsha materıaldar qarastyryldy.
Jıynnyń sońǵy kúnderi ofıserler atys, dene, taktıkalyq, arnaıy daıarlyq sabaqtarynan synaq alyndy. Onyń nátıjesi boıynsha úzdik kórsetkishterdi 30238 áskerı bóliminen leıtenant Bekesh Batyrhanov pen 41433 áskerı bóliminen leıtenant Ásilbek Seıthan kórsetti. Búgingi kúni, komandırlik jıyndar kishi ofıserlik quramnyń sarbazdardy oqytý jáne tárbıeleýge daıyndyq deńgeıin tekserýge baǵyttalǵan emtıhan bolyp tabylady. Sebebi, vzvod komandırleri beıbit jáne soǵys ýaqytynda vzvodtyń jaýyngerlik ázirligine, áskerı tártipke, jeke quramnyń moraldik-psıhologııalyq kúıine, qarý-jaraq pen áskerı tehnıkaǵa jaýap beredi. Vzvod – jaýyngerlik tapsyrmany oryndaı alatyn mańyzdy qurylymdardyń biri.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
