«Qostanaı-Petropavlovsk» baǵytyndaǵy jolaýshylar avtobýsy aýa raıynyń qolaısyzdyǵyna oraı, «Qostanaı-Mamlıýtka» jolynyń kenet jabylýyna baılanysty Uzynkól poselkesiniń tusynda toqtap qalǵan. Dalada túngi aıaz 35 gradýs bolatyn.
«Jel óńmenińnen ótip ketedi. Avtobýstyń ishi mınýt saıyn sýyı bastady. Júrgizýshi bolǵandyqtan jolaýshylar aldyndaǵy jaýapkershilikti de sezinesiń, qutqarýshylarǵa telefon shaldym» deıdi avtobýs júrgizýshisi Gennadıı Sezýhın. Uzynkól aýdandyq Tótenshe jaǵdaılar bóliminiń bastyǵy Janbolat Omarovtyń basshylyǵymen qyzmetkerler kelip, jolaýshylardy jyly bólmege alyp barady. Olarǵa shaı berip, jylytyp, qobaljyǵan kóńilin basady.
–Qutqarýshylarǵa óte rıza boldym. О́zim júrgizýshi bolǵan 20 jyl ishinde osyndaı aýyr jaǵdaıǵa birinshi ret dýshar boldym jáne qutqarýshylar tarapynan adamdarǵa degen jyly qarym-qatynasty kórip, olarǵa degen jolaýshylardyń alǵysyna da kýá boldym, - deıdi Gennadıı.
Qutqarýshylar avtobýstyń jaramdylyǵyn ábden tekserip, Aýdandyq tótenshe jaǵdaılar bóliminiń bastyǵy Janbolat Omarovtyń ózi bastap, avtobýsty Meńdiǵara aýdanynyń ortalyǵyna deıin aparyp saldy. Avtobýs ishindegi 14 adam eshqandaı zardap shekken joq.
Názıra Járimbet,
«Egemen Qazaqstan»
Qostanaı
