Baıqaý elimizde qolǵa alynǵan «Sıfrlyq Qazaqstan» memlekettik baǵdarlamasyn iske asyrý, Batys Qazaqstan oblysynda medıasııany damytýǵa baǵyttalǵan aımaqtyq jobalardy qoldaý jáne medıasııa ınstıtýtyn nasıhattaý maqsatynda uıymdastyryldy. Baıqaý sıfrlyq medıasııa portalynda tirkelgen medıatorlar arasynda ótip, oǵan 10 medıator qatysty.
- Bitimgerlik rásimderdi jáne sotqa deıingi daýdy sheshý ınstıtýttaryn odan ári damytý – sot jumysynyń basym baǵyty, - deıdi Batys Qazaqstan oblystyq sotynyń tóraǵasy Bek Ametov.
Búginde jergilikti ákimdiktiń qoldaýymen Batys Qazaqstan oblysynyń elektrondyq sıfrlyq medıasııa portaly www.mzko.kz iske qosyldy. «Sıfrlyq Qazaqstan» memlekettik baǵdarlamasy aıasynda dúnıege kelgen portal aımaqtaǵy medıasııany damytýǵa yqpal etýde. Munda medıatorǵa onlaın-ótinim berý, ony tirkeý jáne medıatordyń derekteri men qabyldaý ýaqyty kórsetilgen habarlama men túbirtek berý qyzmeti usynylady.
Jyl qorytyndysy boıynsha óńirdegi medıatorlar úsh atalym boıynsha ózara baq synasty. «Daýlardy sheshýdiń úzdik reıtınginde» Batys Qazaqstan oblystyq medıatorlar odaǵynyń tóraǵasy Alýa Rahısheva úzdik bolsa, «Halyq tańdaýy» medıator týraly eń jaqsy pikirlerge ıe bolǵan Rada Haırýshevaǵa tústi. Batys Qazaqstan oblysy Terekti aýdanynyń kásibı medıatory Záýresh Shatıkova «Medıatorlarǵa ótinimder boıynsha úzdik reıtıngi» atalymynda jeńimpaz boldy. Olarǵa «Logitex» JShS kompanııasy atynan aqsha sertıfıkattary tabys etildi. Sondaı-aq baǵaly syılyqqa ıe bolǵandar qatarynda Anar Ábdýǵalıeva men Sáýle Muqanova syndy medıatorlar da bar.
Qazbek QUTTYMURATULY,
«Egemen Qazaqstan»
Batys Qazaqstan
