Balalarǵa mundaı qýanyshty osy aýyldaǵy Novopavlov orta mektebiniń dırektory Hamıt Ǵabdýllın syılady. Onyń eki haskı ıti bar. Sibirlikter shanaǵa jegetin, tegi qasqyrdan shyqqan, tórkini amerıkalyq qos ıt balalardyń kádimgi shanasyn tartqanda sharshaýdy bilmeıdi. Itke aýyr bolmas úshin shanaǵa eki baladan minedi.
– Bul ıtte qasqyrdyń qany bar, aqyldy, jalpy adamǵa tıispeıdi. Balalardy oınatqanda qaýipsiz. Biraq malǵa tıedi. Sondyqtan torda ustaımyz, – deıdi Hamıt Ýálıuly. – Qalyń qarda balalardyń ıt shanaǵa minip, ıtpen birge qarǵa aýnap jatqany qarap tursańyz, qandaı ǵajap kórinis! Aýyl balasynyń tabıǵattan alystamaǵany tárbıe tetigi dep bilemin.
Hamıt Ýálıulynyń ózi de bala kezinen ıt ustaýǵa qumar bolǵan. Halqymyzdyń jeti qazynasynan oryn alǵan ıttiń túrli tuqymyn asyraǵan. Aýyl balasyna qaýipsizdigin oılap, sońǵy jyldary haskıge toqtapty.
– Haskıdi meniń týǵan kúnime týystarym syılap edi. Ittiń bul tuqymy «babasy» sekildi qosaqtalyp nemese úıirimen júrgendi unatatyn bolǵandyqtan, bir ıt jalǵyzsyramasyn dep, ekinshisin ózim satyp aldym, deıdi aýyl pedagogy.
Hamıt Ýálıuly mektep oqýshylaryn týǵan jerdi tanýǵa tárbıelep keledi. Týǵan ólkege jasaǵan ekspedısııalary bólek áńgimeniń jelisi. Oblystaǵy sanaýly skaýttardyń belsendileri de osy aýylda. О́zi respýblıkalyq skaýttar uıymy oblystyq fılıalynyń jetekshisi. Bala tárbıesin basty másele dep túsinetin ustazdyń jeke bastamalary da taýsylmaıdy. Aýyldaǵy balalar shanasyn súırep júrgen haskıler sonyń biri ǵana.
Názıra JÁRIMBET,
«Egemen Qazaqstan»
Qostanaı oblysy,
Qarasý aýdany,
Novopavlov aýyly
