Jetimder týraly bekerge aıtyp otyrǵan joqpyz. Osydan birneshe kún buryn О́skemendegi mamandandyrylǵan balalar úıiniń burynǵy esepshisiniń «Men aqshany jegen, aqshany menimen birlese jegen mundaı dırektormen jumys isteı almaımyn» dep jahanǵa jar salǵan málimdemesi áleýmettik jeliler arqyly kópshilikke taraǵan bolatyn.
Burynǵy bas esepshi eshkim kútpegen tosyn málimdemeni Jańa jyl qarsańynda balalar úıinde osy mekemeniń 160 qyzmetkeriniń jeltoqsan aıyndaǵy jalaqysynyń berilmeýine baılanysty ótken jıynda jasaǵan-dy. Ashy shyndyqty jasyrmaı jaıyp salǵan bas býhgalter 27 jeltoqsanda jumystan bosatylypty. Al balalar úıiniń dırektory Gúlnar Danııarova bul jaǵdaıǵa baılanysty basyn ashyp eshteńe aıtpady, tek quqyq qorǵaý organdaryna resmı túrde aryz jazǵanyn jetkizdi. «Bas býhgalterdiń ústinen shaǵym jazyldy. Endi sol kisiler bárin tekserý kerek» dep qysqa qaıyrdy dırektor.
Balalar úıiniń 160 qyzmetkeriniń jalaqysy, mekemeniń odan arǵy taǵdyry ne bolady? Oblystyq Densaýlyq saqtaý basqarmasynyń basshysy Marat Shoranov jeltoqsan aıy úshin jalaqy qaryzy 15 mıllıon teńgeni quraıtynyn, bul másele baqylaýǵa alynǵanyn, aı sońyna deıin sheshim tabatynyn aıtady. «Mekeme qazir qalypty jaǵdaıda jumys istep tur. Tamaqpen, ártúrli qural-jabdyqtarmen qamtamasyz etilgen» deıdi ol.
Balalar úıinde búginde 5 jasqa deıingi 78 balǵyn tárbıelenip jatyr eken. Al Balalar úıiniń basshylary men esepshileriniń isiniń aq-qarasyn quqyq qorǵaý organdary anyqtaıtyn bolady.
Azamat QASYM,
«Egemen Qazaqstan»
О́SKEMEN
