Mańǵystaý aýdanynda alǵash ret ótkizilgen tájirıbe taratý semınary alty seksııa boıynsha jumys istedi. Mektep dırektorlarynyń basyn qosqan «Jańartylǵan bilim mazmunyn engizý jaǵdaıynda bilim berý prosesin uıymdastyrý erekshelikteri» seksııasynda mektep dırektory jahandyq azamat túsinigi jáne ony orta mektepterde engizýdiń mańyzdylyǵy jóninde baıandap, kásibı baǵdar berý jumystaryn uıymdastyrý týraly aıtty. О́ńirdegi Pedagogıkalyq sheberlik ortalyǵynyń dırektory Q.Boranbaeva «Ujymdy basqarý: kóshbasshylyq jáne komandalyq jumys» taqyrybynda oı órbitti.
«Muǵalimniń kásibı damýy – sapaly bilim negizi» seksııasynda zııatkerlik mekteptiń ustazdary Mańǵystaý aýdanyndaǵy mektep dırektorlarynyń beıindi jumystar jónindegi orynbasarlaryna muǵalim kóshbasshylyǵy arqyly muǵalimniń kásibı damýyna yqpal etý joldarymen, is-árekettegi jáne sabaqty zertteý tájirıbesi, ádis-tásilderi týraly baıandady.
Bıyl kúzde Astana qalasynda ótken H «Jańa dáýirdiń mektebi» ǵylymı-tájirıbelik konferensııasynda álemniń 24 elinen jınalǵan bilim sarapshylary balany tárbıeleý jumystary jaıynda másele kóterip ony mektepte júıeleý týraly, balany mektep aıasynda tárbıeleý ózektiligin joımaǵanyn aıtqan edi. Bul turǵyda zııatkerlik mekteptiń tárbıe berý jumystary ózge mektepterge úlgi retinde taratylýda. Máselen, mektep dırektorynyń tárbıe jumystary jónindegi orynbasary A.Ihsanova men mektep kýratorlary «Máńgilik el» ulttyq ıdeıasy men «Rýhanı jańǵyrý» baǵdarlamasyn júzege asyrý arqyly mekteptegi tárbıe jumysyn uıymdastyrý» seksııasynda bala jáne ata-
anamen jumys, ata-anany mekteppen birge jumys isteýge bet burǵyzý ádisteri jaıly aıtty. Oblystaǵy mektepterge tárbıe baǵytynda tájirıbe taratý mańyzdy máseleler qatarynda bolǵandyqtan, óńirdegi zııatkerlik mektepte «Nazarbaev zııatkerlik mektepteriniń tárbıe júıesiniń tájirıbesinen» taqyrybyndaǵy oblystyq semınar ótip, mektep kýratorlary óńir muǵalimderimen óz tájirıbelerimen bólisken edi. Balaǵa bilim berýdegi mańyzyn joımaıtyn taǵy bir másele – oqýshyny kitap oqýǵa mektep qabyrǵasynda baýlý. Semınarda buǵan qatysty «Oqýshylarda kitap oqý mádenıetin qalyptastyrýdyń belsendi ádisteri» seksııasy uıymdastyryldy. Mektep kitaphanashysy balaǵa «kitap djemi» jáne ertegiler men shyǵarma negizinde «3D kitap jasaýdy» 20-dan asa kitaphanashyǵa kórsetti, birigip kitap jasady. Kitaphanashylar mundaı sharalardyń balalardy kitap oqýǵa baýlıtyndyǵyn aıtty. Sondaı-aq dırektordyń beıindi-eksperımentaldyq jumystar boıynsha orynbasarynyń jetekshiligimen «Krıterıaldy baǵalaý júıesin engizý prosesin basqarý» seksııasy ótti. Mektep koordınatorlaryna pedagogıkalyq sheberlik ortalyǵynyń trenerleri jańartylǵan bilim mazmuny jaǵdaıynda oqýshylardy jıyntyq baǵalaýdyń erekshelikteri týraly baıandady.
Kóptegen pán muǵalimderine qyzyqty bolǵan seksııa – «Jańartylǵan bilim mazmuny boıynsha oqytý erekshelikteri». Bul seksııa boıynsha 200-den asa ustaz zııatkerlik mekteptegi pán muǵalimderine jańa bilim mazmunyna qatysty qyzyqty ádis-tásilderdi tyńdady.
– Zııatkerlik mekteptegi áriptesimizdiń kómegimen búgingi semınarda jańartylǵan bilim berý mazmunyn tıimdi paıdalaný boıynsha óz pánimizge qajetti mańyzdy maǵlumattardy aldyq. Ásirese krıterıaldy baǵalaý jáne toqsandyq baǵalaý boıynsha suraqtarymyzǵa jaýap berildi. Semınar tıimdi ótti dep esepteımin, – deıdi Qaratóbe orta mektebiniń hımııa páni muǵalimi J.Teńizbaeva.
Tájirıbe taratý prosesi barysynda ustazdar tarapynan zııatkerlik mektep muǵalimderiniń sabaq ótkizý prosesine qatysý týraly usynys kóp boldy. Osyǵan oraı, bilim ordasynyń muǵalimderi oblystaǵy 200 pán muǵalimine arnap 40 ashyq sabaq ótkizdi. Arnaıy ashyq sabaq kúninde balalardy sabaq barysynda baǵalaý, taqyrypty túsindirý, keri baılanys prosesterine toqtaldy.
Urpaqqa zamanaýı bilim berý ádis-tásilderin jetildirý baǵytyndaǵy zııatkerlik mekteptiń kóshbasshylyǵy – barsha mektepterge úlgi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
