2018 jyldyń qorytyndylary men 2019 jyldyń josparlaryna arnalǵan qala aktıviniń keńeıtilgen apparattyq keńesi barysynda Astana ákimi Baqyt Sultanov elorda ákimdigi Mádenıet jáne sport mınıstrligimen birlesip, 2020 jylǵa deıin Bozoq tarıhı-mádenı keshenin qurý jumystaryn aıaqtaýdy josparlap otyrǵanyn málimdedi.
«Bıyl Memleket basshysynyń «Rýhanı Jańǵyrý» jáne «Uly dalanyń jeti qyry» baǵdarlamalyq maqalalaryn júzege asyrý boıynsha is-sharalar jalǵasatyn bolady. Onyń sheńberinde birneshe vırtýaldy mýzeıler qurý, muraǵattyq derekterdi sıfrlaý, mektepterde ólketaný mýzeıi men tarıhı-arheologııalyq qozǵalystardy qurý josparlanýda. Atap aıtqanda, Qazaqstan Respýblıkasynyń Mádenıet jáne sport mınıstrligimen birlesip, 2020-shy jylǵa deıin Bozoq tarıhı-mádenı keshenin qurý jumystaryn aıaqtaýdy josparlap otyrmyz. Budan ári Bozoq halyqaralyq deńgeıdegi mádenı, týrıstik jáne ǵylymı-zertteý ortalyǵy, sondaı-aq Eýrazııa aımaǵyndaǵy arheologııalyq-etnografııalyq zertteý ǵylymı-ádistemelik bazasy bolady», - dedi Baqyt Sultanov.
Al arheologııalyq eskertkishterdiń aýmaǵynda ekspedısııalar uıymdastyrylmaq.
«Kıeli Astana» jobasy aıasynda tarıhı eskertkishterdi zertteý úshin 4 arheologııalyq nysannyń aýmaǵynda ǵylymı ekspedısııalar uıymdastyrylady. Ekspedısııanyń nátıjesinde arnaıy kitaptar, jýrnaldar men fotoalbomdar basylyp shyǵarylady dep josparlanyp otyr. Munyń barlyǵy elordadaǵy týrızm damýynyń iskerlik kelbetin damytyp qana qoımaı, onyń tarıhı-mádenı áleýetin arttyrady», - dep atap ótti qala ákimi.
Sonymen qatar, «Uly dalanyń uly órkenıetteri» jalpyulttyq tarıhı-rekonstrýksııalar klýby qurylyp, onyń negizinde Astana men Qazaqstannyń ózge óńirlerinde kóne saqtar; ǵundar, uly túrki qaǵandarynyń dáýiri taqyryptarynda festıval ótkiziletin bolady.
