Jetisýdyń kindik qalasynyń sáýleti men saltanatyn, adamdar arasyndaǵy syılastyq pen qurmet, mahabbat sezimin dáripteıtin týyndy kórermenin birden baýrap aldy.
Egiz uldyń balalyq shaǵynan bastaý alatyn oqıǵa mıýzıkl janrynda ádemi ádiptelip, qazirgi zaman jastary arasyndaǵy adamgershilik qatynas, mamandyq tańdaý men otanshyl, memleketshil bolý uǵymdaryn aıshyqtaýǵa ulasqan. Taǵdyr qalaýymen eki bólek ortada ósken egizderdiń úlken ómir jolyn tańdaýdaǵy qateligi men jetistigi, aýyl men qala tirshiliginiń shynaıy kórinisteri, jastar sanasyndaǵy qaıshylyqty suraqtarǵa jaýap izdeý sıyqty tartymdy sıýjetter kórermendi maǵynaly ázilmen kúldirip, mándi mýzykamen shabyttandyryp jáne astarly oımen tolǵanýǵa jeteleıdi.
- Áýelgide bul mıýzıkldi qysqa metrajdy fılm retinde túsirýdi oılaǵan edik. Oqıǵa jelisiniń órbýi túsirý tobyn da akterlerdi de qyzyqtyryp, lenta 50 mınýtqa sozyldy. Biz bul jumysymyzda jalań aqyl aıtýdan aýlaq boldyq: aýyl men qala ómiri arasyndaǵy alshaqtyq, adamdardyń dáýletti turmysy men áleýmettik jaǵdaıy tómen ortanyń kereǵar sıpatyn, týǵan jerge degen qurmet pen álem tanýǵa degen qushtarlyqtyń da qyrlaryn jastarǵa, jalpy kórermenge uyǵynyqty jetkizýge tyrysytyq. Osy fılmdi túsirýge qoldaý bildirgeni úshin Almaty oblysynyń ákimi Amandyq Batalovqa shyǵarmashylyq top atynan rahmet aıtqym keledi, - deıdi mıýzıkl rejısseri Erlan Oshaqbaev.
Taldyqorǵan qalasynda nebári 15 kúnniń ishinde túsirilgen fılmniń basty keıipkeri – egizder rólin jas akter Erik Qamı somdasa, buǵan deıin kórermenge kóztanys bolǵan Karına Jumaly, Aıan Tólepbergen, Beksultan Qazybek sııaqty ártister de mıýzıkldegi rólderin sátti oınap shyqty.
Taldyqorǵandaǵy «Atameken» kınoteatrynda ótken kórsetilimge aranıy kelgen oblys ákimi Amandyq Batalov mıýzıkldi tamashalaǵan keıin túsirilim tobyn quttyqtady.
- Mıýzıkl kóńildi ári shynaıy fılm bolyp shyqqan eken.. Búgingi fılmde tek qalany ǵana emes, onyń eń basty baılyǵy – onyń meıirimdi de daryndy turǵyndaryn da kórsete bildińder. Kreatıvti oılaryń úshin kóp rahmet aıtamyn. Jýyrda jýrnalısterge bergen suhbatynda Elbasy Taldyqorǵan týraly jaqsy pikirin bildirdi. Biz sol baǵaǵa qýanyp qana qoımaı, soǵan laıyq budan ári de jumys jasaýǵa tıispiz. Biz óz tarapymyzdan jastardyń bastamalaryn qashanda qoldaımyz. Osy jyldy Prezıdent Jastar jyly dep jarııalady. Bul jyl óz múmkindikterińdi barynsha ashýǵa múmkindik beretin erekshe jyl bolmaq, – dedi Amandyq Batalov.
Qalmahanbet MUQAMETQALI,
«Egemen Qazaqstan»
Almaty oblysy
