– «О́z úıim» baǵdarlamasy 2015 jyldan bastap júzege asýda. Ádepkide baǵdarlama talaby boıynsha alǵashqy jarna úı baǵasynyń 30 prosentin jınaqtaý jáne nesıeniń jyldyq ústemesi 8,5 prosent bolsa, ótken jyldan bastap alǵashqy jarna 20 prosent jáne nesıe 7 prosentpen berile bastady. Baǵdarlamanyń bir tıimdi tusy kez kelgen adam qatysa alatyndyǵynda. Eń bastysy, tólem qabiletin rastasa boldy. Atynda jyljymaıtyn múlik bolǵany da kedergi emes jáne kez kelgen qaladan úı alýǵa múmkindigi bar,– deıdi bank fılıalynyń orynbasary Ilııas Jurynov.
Baǵdarlama sharty boıynsha turǵyndar ótken jyldyń 24-i jeltoqsannan bıylǵy jyldyń 14-i qańtary aralyǵynda sol jaǵalaýdaǵy alǵashqy bes úıdiń eki-úsh bólmeli páterlerinen baıqaýǵa qatysý arqyly úı ala alady.
Búginde berilýge tıis 115 páterge baıqaý jarııalanǵannan beri bes júzden astam ótinish túsipti. Eń aldymen úı alýǵa kóp qarjy quıǵan salymshylar joǵary kórsetkishke ıe bolyp, aldyńǵy qatarda ala almaq. «О́z úıim» baǵdarlamasy boıynsha páter 14 jylǵa beriledi.
Mundaǵy erekshelik, alǵashqy segiz jylda nesıeni 7 paıyzben quısańyz, qalǵan 6 jylda 3,8 paıyzben tóleısiz.
Qazaqstan naryǵyna shaqqanda úı baǵasy anaý aıtqandaı qymbat emes. Sharshy metri 120 teńge quraıtyn úıdi alýǵa turǵyndardyń shamasy jetedi.
Baqtııar TAIJAN,
«Egemen Qazaqstan»
Qyzylorda oblysy
