Atalǵan baıqaý Elbasy, «Nur Otan» partııasynyń Tóraǵasy Nursultan Nazarbaevtyń tikeleı tapsyrmasymen qolǵa alynǵan joba. Baıqaýdyń basty maqsaty – jastardyń ǵylym-bilimge jáne ınnovasııaǵa degen qyzyǵýshylyqtaryn arttyryp, olardyń startap jobalaryna qoldaý kórsetý.
Jas ǵalymdardy jeńisterimen quttyqtaı kele partııa Tóraǵasynyń birinshi orynbasary Máýlen Áshimbaev sharanyń mańyzyna toqtaldy: «Jastardyń ǵylymı jumystary laıyqty jalǵasyn taýyp, el damýyna óz úlesin qosatynyna senim bildiremiz. Tórtinshi ónerkásiptik revolıýsııa jaǵdaıynda sıfrlandyrýdyń, ınnovasııanyń jáne jańa tehnologııanyń mańyzy zor. Elbasy osy salaǵa erekshe kóńil bólip, onyń jan-jaqty damýyna barlyq jaǵdaıdy jasap kele jatyr», degen M.Áshimbaev bul iste jastardyń atqarar róli zor ekenin tilge tıek etti.
Bıyl qatarynan úshinshi ret uıymdastyrylyp otyrǵan sharaǵa «Jas Otan» jastar qanaty uıytqy boldy. Nátıjesinde úzdikter qatarynda dep tanylǵan úsh joba jeńimpaz dep tanylyp, ár avtorǵa 1 mıllıon teńgeden qarjylaı syıaqy berildi.
«Áleýmettik mańyzdy ınnovasııalar» atalymy boıynsha qyzylordalyq Nursultan Pirimbetov jeńimpaz atandy. QazCar.kz dep atalatyn onyń jobasy karsherıng qyzmetiniń otandyq úlgisi.
Al D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń jas ǵalymdary tantaldan jasalǵan otandyq medısınalyq ımplanttardyń úlgisin oılap tapqan. Joba «Úzdik jas ǵalym» atalymy boıynsha jeńiske jetti.
«Qazir úlgi klınıkaǵa deıingi synaqtan ótýde. Eger synaq nátıjeleri sátti bolsa, qurylǵylar Qazaqstanda ǵana emes, Reseı naryǵyna da enedi», deıdi joba avtorlary.
Byltyr jobada jeńiske jetip, robot tehnıkasy boıynsha halyqaralyq jarystardyń jeńimpazy atanǵan almatylyq Lıýbov Dýdchenkonyń týrızmdi damytýǵa baǵyttalǵan «joARrney» qosymshasy «Jastardyń ınnovasııalyq jobasy» atalymy boıynsha top jardy. Mobıldi qosymsha Almaty qalasynda taýǵa shyqqysy kelgen týrısterge taýly aımaqtyń tolyq modelin shynaıy formatta kórsetedi.
Budan bólek múgedek arbasyn avtomattandyrý, kózi nashar kóretin nemese múlde zaǵıp jandarǵa arnalǵan robottandyrylǵan taıaq, ózin-ózi retteıtin jylytý kabeli, tozǵan jáne tuzdanǵan jerlerdi qalpyna keltirýge arnalǵan bıomelıorant sekildi jobalar da júldegerler qatarynan kórindi.
Baıqaýǵa qatysýǵa elimizdiń túkpir-túkpirinen 1000-nan astam óren ótinim berip, komıssııa músheleri 30 jumysty aqtyq synǵa iriktep shyǵarǵan. Jalpy jobalar negizinen ekologııa, robot tehnıkasy, balamaly qýat kózderi, jasyl energetıka, ónerkásip, IT, medısına, hımııa, bıologııa, farmasevtıka sekildi salalar boıynsha kelip túsken.
Baýyrjan MUQAN,
«Egemen Qazaqstan»
