Túrkistan oblystyq máslıhatyndaǵy «Nur Otan» partııasynyń depýtattyq fraksııasy janyndaǵy «Nurly jer» baǵdarlamasyn iske asyrýǵa Ulttyq qordan jáne bıýdjetten bólinetin qarajattyń maqsatty ári tıimdi paıdalanylýyn baqylaý jónindegi komıssııanyń otyrysynda depýtat Sháripbek Jamalbek osylaı deıdi.
Kógildir otynsyz otyrǵan aýdan turǵyndarynyń jaı-kúıine alańdaýshylyq bildirgen Sh.Jamalbek óńirdegi kommýnaldyq qyzmet salasynda oryn alǵan kemshilikterdi de kóterip, turǵyndar shaǵymyn oblystyq turǵyn úı-kommýnaldyq sharýashylyq jáne jolaýshylar kóligi basqarmasynyń basshysy Marǵulan Maraıymǵa jetkizdi. Sondaı-aq depýtat kommýnaldyq qyzmet jáne onyń baǵasyna qatysty kóptegen másele Elbasy aıtpasa sheshimin tappaı tura beretinin aıtyp, halyq ıgiligi úshin jumys isteýge kelgende bilek sybanýdyń ornyna enjarlyq tanytatyn shendilerge ókpesin jasyrmady.
Komıssııa otyrysynda 2018 jyldyń qorytyndysy boıynsha Túrkistan oblysynda «Nurly jer» baǵdarlamasynyń júzege asyrylý barysyna jaýapty basqarma basshylarynyń esebi tyńdaldy. Oblysta «Nurly jer» baǵdarlamasynyń «satyp alý múmkindiginsiz jalǵa beriletin turǵyn úı qurylysy» baǵyty aıasynda Túlkibas aýdanynda 7 jáne Kentaý qalasynda 7 turǵyn úıdiń qurylysy júrgizilýde. Al Túrkistan qalasynda 12 turǵyn úı salynýda. Sondaı-aq baǵdarlamanyń birqatar baǵyty boıynsha bastalǵan jumystar belgilengen merziminde aıaqtalǵan. Túrkistan oblystyq qurylys basqarmasynyń basshysy Toqtar Ýsýbalıevtiń aıtýynsha, bıyl oblysta «7-20-25» baǵdarlamasyn iske asyrý úshin 7 mlrd teńge qaralyp otyr. Depýtattar memlekettik baǵdarlama aıasynda usynylǵan páterler baǵasy aýyldyqtar úshin tipti qymbatqa túsetinin aıtty. Bul oraıda basqarma basshysy «merdigerler qazir turǵyn úıdiń sharshy metriniń baǵasyn 180 myń teńgeden 140 myń teńgege túsirip jatyr. Taǵy múmkindikter bolsa qarastyramyz» degen ýáj aıtty. Qurylys salasyndaǵylardyń sózine qaraǵanda, aldaǵy ýaqytta oblysta kópqabatty turǵyn úıler kóptep boı kóteredi. Iаǵnı mamandar osylaısha eldi mekenderde kommýnaldyq problemalardyń aldyn almaq.
Aıta ketelik, Túrkistan oblysynda bıyl 4377 páter paıdalanýǵa beriledi. Oblysta 28 myńnan asa turǵyn páter kezeginde turǵanyn eskersek, bıyl el ıgiligine tapsyrylatyn 4377 páterdi kóp deýge de bolmas. Degenmen, qurylys salasynda qarqyn báseńdegen joq. Mysaly, oblysta turǵyn úıler qurylysyna aǵymdaǵy jyly respýblıkalyq bıýdjetten 3,5 mlrd teńge, al oblystyq bıýdjetten 7,3 mlrd teńge qarastyrylyp, 63 kópqabatty arendalyq turǵyn úıdiń qurylysy júrgiziletin bolady. Bıyl osy úılerdiń 47-sin paıdalanýǵa berý josparlanǵan. Sondaı-aq «Nurly jer» baǵdarlamasy boıynsha ótken jyldyń basynda 13 aýdan, qala ákimdikterine 31 ekiqabatty turǵyn úı salýǵa oblystyq bıýdjetten qarjy qarastyrylǵan bolatyn. Búgingi tańda 12 turǵyn úıdiń qurylysy aıaqtalǵan, al 190 páterli 19 úı bıyl birinshi jartyjyldyqta paıdalanýǵa berilmek.
Al «7-20-25» baǵdarlamasy aıasynda Túrkistan qalasynda «Túrkistan» ÁKK AQ jáne jeke salýshy arqyly qurylysy ótken jyly bastalǵan 6 kópqabatty turǵyn úıdi bıyl 3-toqsanda paıdalanýǵa berý josparlanyp otyr. Sonymen qatar Túrkistan qalasynyń Otyrar shaǵyn aýdanynda «Túrkistan – jańa qala» turǵyn úı keshenderindegi aýmaǵy 38 gektar jer teliminde 88 kópqabatty turǵyn úı boı kóterip, aǵymdaǵy jyly onyń 44-i, ıaǵnı 1362 páter «7-20-25» baǵdarlamasy arqyly beriletin bolady.
Ǵalymjan ELShIBAI,
«Egemen Qazaqstan»
