Alpys bes jyldyq tarıhy bar bilim ordasynda eńbek etetindikten, bilim salasynyń qazanynda qaınap júrgendikten Joldaýǵa oı qossam deımin.
Jasyratyny joq, jalaqy az bolǵannan keıin jastardyń kóbi muǵalimdikke kelgisi kelmeıdi. Jastar bolǵanda qandaı jastar? Mektepti úzdik bitirgen, bilimdi, alǵyr, ózgeshe oılaıtyn jańashyl jastar. Bilim ordalaryna osyndaı jastar kelse kerek edi. Ondaı jastar muǵalim bolǵysy kelmeıdi. Kelse de sırek. О́zin qurmetteıtin, óziniń bilimin, deńgeıin baǵalaıtyn jastar jalaqysy joǵary jerlerge barady. Sodan keıin muǵalimdikke kimder keledi? Kóbine óz mamandyǵy boıynsha jumys tappaǵan, bilim deńgeıi ortasha jastar keledi. Mundaı adamdar balany qalaı tárbıeleıdi? Máselen, bizdiń kolledjde er muǵalimder jetispeıdi. Olardyń úlesi 10 paıyzdan aspaıdy. Uldar az jalaqyǵa shydamaı ketip qalady. Al qyzdar úırenip, kóndigip ketedi. Bizge ustazdyqqa negizinen qyzdar keledi. Al stýdentterdiń deni – uldar. Bıyl muǵalimderdiń mártebesi týraly zań qabyldanyp, zań sheńberinde kolledj muǵalimderiniń jalaqysy kóterilse, bul másele sheshimin tabatyn shyǵar dep oılaımyz. Bizge tájirıbeli, bilikti mamandar kelse, kolledjdiń de deńgeıi kóterileri anyq. Bizdiń oıymyz – zań aıasynda muǵalimderge jeńildikter kóbeıse deımiz. Máselen, áskerılerge baspana alýǵa beriletin jeńildik nege muǵalimderge jasalmasqa?! Kóp dúnıe jalaqyǵa kelip tireledi. Kolledjge kelgen jas muǵalim 40-50 myń teńge alady. Bir-eki jyl istegennen keıin baryp koeffısıent qosylady. Jalaqysy az bolǵannan keıin saǵatyn arttyryp, kóbirek júkteme berýge tyrysamyz. Biraq budan bilim sapasy jaqsarmaıdy. Eger jalaqy joǵary bolsa, ustazdardyń saǵatyn qysqartyp, sapaǵa mán berer edik.
Taǵy bir eskerer dúnıe, joǵary oqý oryndarynda bolashaqta muǵalim bolatyn jandarǵa talapty kúsheıtip, iriktep alǵan jón sekildi. Irikteýden urpaq tárbıeleı alýǵa qabiletti, eldi, jerdi súıetin bilimdi, alǵyr jastar ótse, nur ústine nur bolar edi. Qazir muǵalimdik qasıeti joq bolsa da, sabaq berip júrgender kóp. Odan kim zardap shegedi? Oqýshylar men stýdentter zardap shegedi.
Oıymyzdy uly Muhańnyń, Muhtar Áýezovtiń sózimen túıinder bolsaq, adam men adamdy, halyq pen halyqty bilim teńestiredi. Bilim salasy quldyraǵan eldiń kúnderdiń kúninde óziniń de quldyraıtyny anyq. Sondyqtan «Pedagog mártebesi týraly» zańnan kóp úmit kútemiz.
Isataı ISIN,
О́skemen polıtehnıkalyq kolledjiniń dırektory
