Oblystyq deneshynyqtyrý jáne sport basqarmasynyń basshysy Rınat Ibragımovtyń aıtýynsha, 2018 jyly óńirde 1200 sporttyq shara ótip, 245 myń adamdy qamtyǵan. Qazir oblys boıynsha 858 dene tárbıesi ujymy jumys isteıdi. Balalar men jasóspirimderge sporttyń 22 túrimen aınalysýǵa múmkindik jasalǵan. Olımpıadalyq rezerv daıyndaý ortalyǵynda 159 oqýshy sportpen shuǵyldanady.
– 2018 jyly bizdiń sportshylar ártúrli deńgeıdegi sporttyq sharalarǵa qatysyp, 1194 medal jeńip aldy. Bir jyldyń ózinde oblysta 10 halyqaralyq dárejedegi sport sheberi, 18 sport sheberi, 145 sport sheberligine úmitker daıyndaldy. Osy jyly 220 atyraýlyq sportshy birneshe sport túrinen Qazaqstan Respýblıkasynyń ulttyq qurama komandasyna kirdi, – deıdi basqarma basshysy.
Aımaqta sporttyq ınfraqurylymdy damytý aıryqsha nazarda. О́tken jyly 52 nysan paıdalanýǵa berildi. Bul kórsetkish bıyl taǵy da arta túspek. Qazir Mahambet aýdany Aqjaıyq aýylyndaǵy deneshynyqtyrý-saýyqtyrý kesheniniń qurylysy aıaqtalýǵa jaqyn. Jylyoı, Qurmanǵazy aýdandarynda sport keshenderi salynyp jatyr. Jaqyn bolashaqta deneshynyqtyrý jáne sportpen aınalysý úshin 45 nysan qurylysy júrgiziledi. Bir atap óterligi, sportty damytýǵa qarajat tek memlekettik bıýdjetten ǵana bólinbeıdi. Sporttyq ınfraqurylymdy damytýǵa kommersııalyq qurylymdar da úles qosýda.
– О́ńirde ulttyq sport túrleri de órkendep keledi. Sporttyq mektepterde toǵyzqumalaq, qazaqsha kúres úıirmeleri bar, jekpe-jekten oblystyq federasııa qurylǵan. 2018 jyly Atyraýda ulttyq sport túrleri boıynsha «Kaspıı kýbogy – Jaıyq jaǵasynda» halyqaralyq týrnıri ótti, – deıdi Rınat Ibragımov. – Oblysta 8 sport klýby bar. Múmkindigi shekteýli jandardyń da sportpen aınalysýlary úshin jaǵdaı jasalǵan. Atyraý oblysynan paralımpıada quramasyna 44 sportshy endi. 13 sportshynyń halyqaralyq dárejedegi sport sheberi ataǵy bar, 27 sportshy Qazaqstan Respýblıkasynyń sport sheberi, 45 sport sheberligine úmitker bar.
Sport pen salamatty ómir saltyn nasıhattaýdyń taǵy bir tıimdi joly retinde oblys ortalyǵynda «Sporttyq aıaldamalar» – kóshedegi jattyǵý qondyrǵylary ornatyldy. Atyraý qalasynyń ár bóliginde 30 jattyǵý quraly, 4 «Street Workout» alańy bar. Endi skeıt-parkýr, strıt-vorkaýtpen aınalysatyn oryndar qarastyrylǵan jastar saıabaǵy salynady. Memleket-jekemenshik áriptestik arqyly jabyq jeńil atletıka manejin salý da josparda bar. Munyń bári buqaralyq sportty damytýǵa baǵyttalǵan qadamdar. Sońǵy málimet boıynsha, oblys turǵyndarynyń 31 paıyzy sportpen aınalysady. Bul kórsetkishtiń de jyldan-jylǵa artyp kele jatqany kóńil qýantady.
Baqytgúl BABASh,
«Egemen Qazaqstan»
ATYRAÝ
