Oblystyq ekologııa departamentiniń basshysy Murat Qurmanbaev kóptegen áleýmettik nysandarda las sý jınaqtaıtyn septık salynǵanymen keıbir aýdanda áli de qaldyqqa arnalǵan káriz júıesi sheshimin tappaı otyrǵandyǵyn aıtty. Departament basshysy ekologııalyq ahýalǵa áser etetin osyndaı jaýapsyzdyqtardy retke keltirý jónindegi óz usynystaryn baıandap berdi. Qatty qaldyqtardy óńdeý máselesinde túıtkildi tustar joq emes.
Qyzylorda oblysynyń tabıǵı resýrstar jáne tabıǵatty paıdalanýdy retteý basqarmasynyń basshysy Aıdar Ábdýálıev aımaqtyń ekologııalyq máseleleriniń ishindegi mańyzdysy polıgondardy ekologııalyq jáne sanıtarlyq talaptarǵa sáıkestendirý ekendigin aıtty.
– Barlyq aýdan men qala ákimdikteri óndiris jáne tutyný qaldyqtaryn ornalastyrýǵa 145 jer ýchaskesin belgilep, tıisti qujattaryn tolyǵymen resimdedi. 2013-2015 jyldary Qarmaqshy, Qazaly aýdandarynyń ortalyqtarynda polıgon qurylystary júrgizildi. 2018 jyly 1-shi kezekte oblystyq bıýdjetten Aral qalasyna polıgon salýǵa qarjy bólindi. Qalǵan qarajat 2019 jylǵy naqtylanǵan bıýdjetke usynyldy. Memleket-jekeshelik áriptestigi aıasynda Qyzylorda qalasynda turmystyq qatty qaldyqtardy suryptaý kesheni men polıgon qurylysyn iske asyrý jobasy bastaldy. Atalǵan jumystardy jalǵastyrý maqsatynda Sekseýil men Tereńózek kentine polıgon qurylystaryna bıýdjetke ótinim usynyldy. Qalǵan Jańaqorǵan, Shıeli, Jalaǵash aýdandary polıgonnyń joba-smetalyq qujattaryn áli kúnge deıin sozýda, – dedi ol.
Oblystyń barlyq aýdanynda qaldyqtardy óńdeý boıynsha tıisti jumystar óz deńgeıinde júrgizilmeıdi. Oblys boıynsha 2018 jyly jınaqtalǵan 147,0 myń tonna qatty turmystyq qaldyqtardyń 4700 tonnasy óńdelgen. Iаǵnı, bul salada atqarylatyn jumys jetkilikti.
Baqtııar TAIJAN,
«Egemen Qazaqstan»
Qyzylorda oblysy
