«О́zimizde júrekke kúrdeli, ashyq ota jasaý, jalpy kardıologııalyq qyzmet kórsetý aýrýhanaǵa RChL apparatynyń, tamyr ishin tekseretin ÝZI jáne taǵy basqa zamanaýı jabdyqtardyń bolýyn talap etý sebebinen toqtatylǵan edi. Onyń barlyǵy da qarjylandyrýdaǵy qıyndyqtardan oryn aldy. 2018 jyly aýrýhanalarda birde-bir ota jasaǵan joqpyz. Barlyq naýqastardy Astanaǵa jiberip otyrdyq» deıdi oblystyq aýrýhananyń bas dárigeri Iýrıı Moıseev. Áý basta oblystyq aýrýhananyń kardıologııa bólimshesinde jylyna 5-6 ota jasala bastady. Keıin Rýdnyı qalalyq aýrýhanasynyń dárigerleri de júrek aqaýyn otalyq jolmen emdeı bastady. Burnaǵy jyldary eki aýrýhanada jylyna 170-ke deıin ota jasalǵan bolatyn. Biraq júrek aqaýynan zardap shekkender sany kóp bolǵandyqtan, aptasyna 5 naýqasqa deıin Astanaǵa baryp emdelýge jiberip otyrdy. Kardıologııalyq naýqastardy ota arqyly emdeý ýaqytsha toqtaǵanmen, kadrlar biliktiligi tómendemegen, olardy daıyndaý, oqytý, tájirıbeden ótkizý jumystary jalǵasa berdi.
Jaqynda oblystyq aýrýhanaǵa angıograf apparaty alyndy. Ol tamyrdaǵy qan júrisin anyqtaıdy. Oblystyq aýrýhananyń angıografııa bólimshesiniń meńgerýshisi Bolat Qanafınniń aıtýynsha, elimizdiń soltústik oblystarynda bul apparattyń balamasy joq.
«Ádette, kardıologııalyq ortalyqtar barlyq oblysta jumys isteıdi. Olarda júrek-qan tamyrlary aýrýlaryn anyqtaıtyn apparattar bar, bireý emes, birneshe bolýy da yqtımal. Biraq biz alyp otyrǵan japondyq apparat Qazaqstan óńirleri arasynda Shymkent pen bizde ǵana bar. Paıdalanýǵa óte yńǵaıly, zamanaýı úzdik qural. Onymen jumys isteýdiń sapasy respýblıkadaǵy ortalyqtardan esh kem soqpaıdy» deıdi Bolat Qanafın.
Endi júrek aqaýynan zardap shekken qostanaılyqtar syrtqa shabylmaı, oblys ortalyǵy men Rýdnyı qalasyndaǵy aýrýhanalarda em alatyn bolady.
«Astanada aýrýlarǵa otany sapaly jasaıdy, biraq naýqastarǵa qarjy jaǵynan qıyndyq ákelýi múmkin, olardyń úlken qalada toqtaıtyn úıi, sapaly kútimi bola bermeıdi. Olar ota jasalǵan soń Qostanaıǵa jetkenshe on eki saǵat poıyz ústinde shaıqalyp keledi. Munyń barlyǵy naýqasqa artyq salmaq salady. Al ózimizde emdesek, olardyń otadan keıingi kútimi de jaqsarady, qınalmaıdy. Qazir oblysta jedel ota jasaýdy kerek etetin 20 naýqas kezekte tur» deıdi kardıohırýrg Qaırat Begenov.
Al Qostanaıda júrek-qan tamyrlary aýrýlarynyń birneshe túrinen jylyna keminde 300 operasııa jasalýy tıis. Ázirshe oblysta ázirge 40 ota jasaýǵa ruqsat berilgen. Qaırat Begenovtiń aıtýynsha, aldaǵy ýaqyttaǵy otanyń sany qarjylandyrýǵa baılanysty bolmaq.
Názıra JÁRIMBET,
«Egemen Qazaqstan»
Qostanaı
